مستونگ میں نامعلوم مسلح افراد کے ہاتھوں 9 مزدور اغوا

کوئٹہ (ڈیلی اردو) بلوچستان کے شورش زدہ ضلع مستونگ کی تحصیل دشت میں نامعلوم مسلح افراد نے 9 مزدوروں کو اغوا کر لیا۔

لیویز حکام کے مطابق یہ مزدور علاقے میں ایک زیر تعمیر عمارت پر کام کر رہے تھے اور واپسی کے دوران پک اپ سمیت اغوا کر لیے گئے۔ حملہ آوروں نے کچھ فاصلے پر جا کر گاڑی کے ڈرائیور کو چھوڑ دیا، جبکہ مزدوروں کو پک اپ سمیت نامعلوم مقام پر لے گئے۔

ذرائع کے مطابق اغوا ہونے والے مزدوروں کا تعلق پنجاب اور سندھ کے مختلف علاقوں سے بتایا جاتا ہے۔

اطلاع ملنے پر لیویز فورس اور دیگر قانون نافذ کرنے والے اداروں نے علاقے کو گھیرے میں لے کر پہاڑی سلسلوں اور اطراف کے مقامات پر سرچ آپریشن شروع کر دیا ہے۔

ضلعی انتظامیہ کے مطابق مزدوروں کی بازیابی کے لیے تمام وسائل بروئے کار لائے جا رہے ہیں، تاہم تاحال کسی گروہ نے واقعے کی ذمہ داری قبول نہیں کی۔