مشرقی لیبیا: دہشتگردی اور ٹارگٹ کلنگ کے مقدمات میں 10 افراد کو پھانسی

مشرقی لیبیا(ڈیلی اردو) لیبیا کی مسلح افواج کی جنرل کمان سے وابستہ فوجی استغاثہ کے دفتر نے دہشتگردی اور ٹارگٹ کلنگ سے متعلق مقدمات میں سزا پانے والے 10 افراد کو فائرنگ کے ذریعے پھانسی دیے جانے کی تصدیق کی ہے۔

فوجی استغاثہ کے مطابق تمام ملزمان کے خلاف مقدمات میں کئی سال تک عدالتی کارروائی جاری رہی، جس کے بعد اعلیٰ فوجی عدالت نے سزائے موت کے حتمی فیصلے سنائے اور قانونی تقاضے مکمل ہونے کے بعد سزاؤں پر عملدرآمد کیا گیا۔

بیان کے مطابق ملزمان پر لیبیا میں کالعدم قرار دی گئی دہشتگرد تنظیموں سے وابستگی اور فوجی اہلکاروں سمیت شہریوں کے قتل میں ملوث ہونے کے الزامات ثابت ہوئے تھے۔

فوجی استغاثہ کا کہنا ہے کہ سزاؤں پر عملدرآمد ملکی قوانین کے تحت کیا گیا، جس کا مقصد دہشتگردی اور قتل کی وارداتوں میں ملوث عناصر کے خلاف قانونی کارروائی کو یقینی بنانا ہے۔

واضح رہے کہ مشرقی لیبیا کے وسیع علاقوں پر خلیفہ حفتر کی قیادت میں جنرل کمان سے وابستہ فورسز کا کنٹرول ہے، جبکہ ملک کے مغربی حصے میں طرابلس کی انتظامیہ سے وابستہ مختلف سکیورٹی اور عسکری ادارے فعال ہیں۔