معرکہ حق میں بھارت کے 4 رافیل سمیت 8 طیارے مار گرائے گئے، پاکستان فضائیہ

اسلام آباد (ڈیلی اردو) پاکستانی فوج کے ڈپٹی چیف آف ایئر سٹاف نے ڈی جی آئی ایس پی آر کے ہمراہ پریس کانفرنس میں دعویٰ کیا ہے کہ ’’معرکہ حق‘‘ کے دوران پاک فضائیہ نے بھارت کے مجموعی طور پر 8 جنگی طیارے مار گرائے، جس کے بعد صورتحال ’’8-0‘‘ کے اسکور کے ساتھ پاکستان کے حق میں رہی۔

پریس کانفرنس میں بتایا گیا کہ مار گرائے گئے طیاروں میں چار رافیل، ایک ایس یو-30، ایک مگ-29، ایک مِراج طیارہ اور ایک جدید ملٹی رول ڈرون شامل ہے۔

ڈپٹی چیف آف ایئر سٹاف کے مطابق 29 اپریل کو چار رافیل طیاروں نے کشمیر ریجن میں داخل ہونے کی کوشش کی، تاہم پاک فضائیہ نے فوری اور مؤثر ردعمل دیتے ہوئے دشمن کی پیش قدمی ناکام بنائی اور اسے پسپا ہونے پر مجبور کیا۔

انہوں نے کہا کہ معرکہ حق میں حاصل ہونے والی کامیابی پاکستان کی مجموعی دفاعی صلاحیت کا صرف ایک چھوٹا حصہ تھا، جبکہ اصل عسکری طاقت کا بڑا حصہ ابھی ظاہر نہیں کیا گیا۔

ڈی جی آئی ایس پی آر نے اس موقع پر کہا کہ پاکستان ہر قسم کی صورتحال کے لیے مکمل طور پر تیار ہے اور دفاع وطن پر کوئی سمجھوتہ نہیں کیا جائے گا۔ ان کے مطابق دشمن کو واضح پیغام دیا جا چکا ہے کہ کسی بھی جارحیت کا بھرپور اور فوری جواب دیا جائے گا۔

انہوں نے مزید کہا کہ پاکستان کی دفاعی حکمت عملی زمین، فضا، سمندر، سائبر اور معلوماتی محاذ سمیت ہر سطح پر مضبوط ہے، اور قوم اپنے اداروں کے ساتھ مکمل یکجہتی رکھتی ہے۔

پریس کانفرنس میں یہ بھی اعلان کیا گیا کہ 14 اگست کو ہونے والی تقریب میں پاکستان اپنی دفاعی صلاحیتوں کا محدود مگر واضح مظاہرہ کرے گا۔