ملک کی صورتحال انتہائی حساس اور نازک ہے: اسفندیار ولی خان

پشاور (ویب ڈیسک) عوامی نیشنل پارٹی کے سربراہ اسفندیار ولی خان نے کہا ہے کہ ملک کی صورتحال انتہائی حساس اور نازک ہے، وکلاء برادری سپریم کورٹ پر شب خون مارے جانے کیخلاف احتجاج کی کال دے رہی ہے۔

اسفند یار ولی خان نے اپنے بیان میں کہا کہ موجودہ تبدیلی حکومت کی ناکامیوں نے عوام کا جینا دو بھر کر دیا ہے، وکلا برادری سپریم کورٹ پر شب خون کے خلاف احتجاج کی کال دے رہی ہے۔

عوامی نیشنل پارٹی کے پاکستان بھر کے کارکنان وکلاء برادری اور اپوزیشن کے ساتھ مل کر شانہ بشانہ احتجاج میں شرکت کریں۔

اسفندیار ولی نے کہا کہ اے این پی نے ہمیشہ آئین و قانون ،جمہوریت ، آزاد عدلیہ اور میڈیا کے لئے جدوجہد کی، آج موجودہ حکومت کی آمرانہ پالیسیاں نظر آ رہی ہیں، ہم آج بھی اپوزیشن کو کہتے ہیں اپنے اختلافات ختم کرکے ایک پیج پر اکٹھے ہوں۔

ان کا کہنا تھا کہ اس وقت ملک کو معاشی بحران ، مہنگائی ، بے روزگاری کا سامنا ہے، وفاق اداروں پر حملے کا متحمل نہیں ہو سکتا، ملک کو مشکلات سے نکالنے کے لیے ہم سب کو مل کر جدوجہد کرنا ہوگی۔