منڈی بہاؤالدین : احمدی برادری سے تعلق رکھنے والا مکینک فائرنگ سے ہلاک

منڈی بہاؤالدین (ڈیلی اردو) پنجاب کے ضلع منڈی بہاؤالدین میں نامعلوم مسلح افراد نے فائرنگ کرکے احمدی برادری سے تعلق رکھنے والے ایک شخص کو ہلاک کردیا۔

پولیس کے مطابق واقعہ بدھ کی شام عیدگاہ کے قریب مرکزی سڑک پر پیش آیا، جہاں مقتول مرزا صفدر اپنے ورکشاپ سے گھر واپس جارہا تھا۔ ابتدائی معلومات کے مطابق دو مسلح افراد نے اسے مبینہ طور پر تعاقب کے بعد فائرنگ کا نشانہ بنایا اور موقع سے فرار ہوگئے۔

پولیس نے واقعے کو بظاہر ایک منصوبہ بندی کے تحت کیا جانے والا ہدفی حملہ قرار دیتے ہوئے مختلف پہلوؤں سے تحقیقات شروع کردی ہیں۔ حملے میں ملوث افراد کی شناخت اور گرفتاری کے لیے بھی کارروائی جاری ہے۔

مقامی پولیس کے مطابق واقعے کی مزید تحقیقات کے بعد حملے کے محرکات اور دیگر حقائق واضح ہوسکیں گے۔