مہمند اور ڈی آئی خان میں سکیورٹی فورسز کے آپریشن، 4 دہشت گرد ہلاک

راولپنڈی (ک م) پاکستانی سکیورٹی فورسز نے خیبرپختونخوا کے دو مختلف اضلاع میں کارروائیاں کرتے ہوئے 4 دہشت گردوں کو ہلاک کرنے کا دعویٰ کیا ہے۔

پاک فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے 3 اور 4 جون کی درمیانی شب دو انٹیلیجنس بنیادوں پر کارروائیاں کیں۔

آئی ایس پی آر کے مطابق پہلی کارروائی ضلع ڈیرہ اسماعیل خان میں دہشت گردوں کی موجودگی کی اطلاع پر کی گئی، جہاں سکیورٹی فورسز نے ایک ٹھکانے کو نشانہ بنایا۔ بیان کے مطابق شدید فائرنگ کے تبادلے کے بعد دو دہشت گرد ہلاک ہو گئے۔

فوج کے مطابق دوسری کارروائی ضلع مہمند میں کی گئی، جہاں مزید دو دہشت گرد مارے گئے۔ آئی ایس پی آر کا کہنا ہے کہ ہلاک افراد کے قبضے سے اسلحہ اور گولہ بارود بھی برآمد کیا گیا۔

بیان کے مطابق ہلاک ہونے والے افراد مختلف دہشت گرد کارروائیوں میں ملوث تھے جبکہ علاقے میں مزید ممکنہ دہشت گردوں کی موجودگی کے خاتمے کے لیے کلیئرنس آپریشن جاری ہے۔

آئی ایس پی آر نے کہا کہ غیر ملکی سرپرستی اور حمایت یافتہ دہشت گردی کے خاتمے تک انسدادِ دہشت گردی کارروائیاں جاری رکھی جائیں گی۔

دوسری جانب وزیراعظم شہباز شریف نے ڈی آئی خان اور مہمند میں کارروائیوں پر سکیورٹی فورسز کو خراج تحسین پیش کرتے ہوئے کہا کہ دہشت گردی کے خاتمے تک کارروائیاں جاری رہیں گی۔

وزیراعظم نے کہا کہ قوم اپنی مسلح افواج اور سکیورٹی اداروں کی قربانیوں کو قدر کی نگاہ سے دیکھتی ہے اور پاکستان کے امن و استحکام کے خلاف ہر سازش کو ناکام بنایا جائے گا۔