مہمند میں سیکیورٹی فورسز کی بی ڈی ٹیم پر دھماکا، 3 اہلکار ہلاک، 4 زخمی

غلنئی (نمائندہ ڈیلی اردو) پاکستان کے شورش زدہ صوبہ خیبرپختونخوا کے قبائلی ضلع مہمند میں سیکیورٹی فورسز کی ٹیم پر دھماکے میں 3 اہلکار ہلاک اور  4 زخمی ہوگٙے۔ 

ڈیلی اردو کے مطابق تحصیل صافی کے علاقے مامد گٹ کے قریب سیکیورٹی فورسز کی بارودی مواد تلف کرنے والی (بی ڈی) ٹیم معمول کی کارروائی کے دوران دھماکے کا نشانہ بن گئی۔ 

سیکیورٹی ذرائع کے مطابق دھماکے کے نتیجے میں 3 سیکیورٹی اہلکار ہلاک  جبکہ 4 اہلکار زخمی ہوئے۔

ہلاک ہونے والوں میں نائب صوبیدار اختر باز، لانس نائیک محب دین اور سپاہی شفیق شامل ہیں، جبکہ زخمی اہلکاروں میں نائیک اسلام حق، لانس نائیک حق نواز، سپاہی افراز اور سپاہی حکیم شامل ہیں۔

ذرائع کے مطابق واقعے کے بعد زخمی اہلکاروں کو فوری طور پر طبی امداد کے لیے مامد گٹ منتقل کر دیا گیا۔

سیکیورٹی ذرائع کا کہنا ہے کہ واقعے کی مزید تحقیقات جاری ہیں۔