نائیجیریا میں امریکہ کے ساتھ مشترکہ فضائی کارروائیاں، 175 داعش جنگجو ہلاک

واشنگٹن/ابوجا (ڈیلی اردو رپورٹ) نائیجیریا کی فوج کے مطابق امریکی اور نائیجیریا کی مشترکہ فضائی کارروائیوں میں کم از کم 175 داعش (اسلامک اسٹیٹ) کے جنگجو ہلاک ہو گئے ہیں۔

نائجیرین فوجی حکام نے بتایا کہ یہ کارروائیاں ملک کے شمال مشرقی علاقوں میں کی گئیں، جہاں شدت پسند گروہوں کے خلاف آپریشن جاری ہے۔

امریکی افریقہ کمانڈ (AFRICOM) نے بھی کارروائیوں کی تصدیق کرتے ہوئے کہا ہے کہ یہ مشترکہ آپریشن تھا اور اس میں کسی بھی امریکی یا نائجیرین فوجی کو نقصان نہیں پہنچا۔ 

حکام کے مطابق ان حملوں میں داعش کے متعدد اہم کمانڈرز بھی مارے گئے جبکہ ان کے اسلحہ خانے، ٹھکانے اور مالی و لاجسٹک نیٹ ورک کو بھی نشانہ بنایا گیا۔

امریکی حکام کا کہنا ہے کہ یہ کارروائیاں خطے میں بڑھتی ہوئی دہشت گردی کے خلاف وسیع تر حکمتِ عملی کا حصہ ہیں، جہاں داعش اور اس سے منسلک گروہ مسلسل سرگرم ہیں۔ 

یہ پیش رفت ایسے وقت میں سامنے آئی ہے جب مغربی افریقہ میں شدت پسند گروہوں کے خلاف امریکی فوجی تعاون میں اضافہ دیکھا جا رہا ہے۔