نوشہرہ: اکوڑہ خٹک میں دہشت گردی کا بڑا منصوبہ ناکام، خودکش جیکٹ برآمد

نوشہرہ (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع نوشہرہ کی تحصیل اکوڑہ خٹک میں پولیس نے بروقت کارروائی کرتے ہوئے ممکنہ دہشت گردی کا ایک بڑا منصوبہ ناکام بنا دیا۔ کارروائی کے دوران سابقہ افغان مہاجر کیمپ شنہ ونہ کے قریب سے تقریباً سات کلوگرام وزنی خودکش جیکٹ برآمد کر لی گئی۔

پولیس کے مطابق تھانہ اکوڑہ خٹک کے ایس ایچ او عادل سید کو باوثوق ذرائع سے اطلاع ملی تھی کہ سابقہ افغان مہاجر کیمپ شنہ ونہ کے علاقے میں ایک مشکوک بوری پڑی ہوئی ہے، جس میں دھماکا خیز مواد موجود ہونے کا خدشہ ہے۔

اطلاع ملتے ہی ایس ایچ او عادل سید پولیس نفری کے ہمراہ موقع پر پہنچ گئے، جبکہ سرکل اکوڑہ خٹک کے ایس ڈی پی او عدنان اعظم بھی اضافی نفری کے ساتھ جائے وقوعہ پر پہنچ گئے۔

کسی بھی ممکنہ خطرے سے نمٹنے کے لیے پولیس نے فوری طور پر علاقے کو گھیرے میں لے لیا، شہریوں کی آمدورفت محدود کر دی اور بم ڈسپوزل یونٹ (بی ڈی یو) کو طلب کر لیا۔

بم ڈسپوزل یونٹ نے احتیاط سے مشکوک بوری کی تلاشی لی، جس کے دوران تقریباً سات کلوگرام وزنی خودکش جیکٹ برآمد ہوئی۔ بعد ازاں ماہرین نے خودکش جیکٹ کو محفوظ طریقے سے اپنی تحویل میں لے لیا تاکہ مزید تکنیکی جانچ کی جا سکے۔

پولیس حکام کے مطابق واقعے کے بعد علاقے میں سکیورٹی مزید سخت کر دی گئی اور ممکنہ سہولت کاروں یا مشتبہ افراد کی تلاش کے لیے رات بھر سرچ آپریشن جاری رکھا گیا۔

حکام کا کہنا ہے کہ برآمد ہونے والی خودکش جیکٹ کے حوالے سے تحقیقات جاری ہیں۔