نوشہرہ: ن لیگ کے صوبائی رہنماء نواب علی خان پر قاتلانہ حملہ، محافظ ہلاک

نوشہرہ (ڈیلی اردو/ٹی این این) صوبہ خیبر پختونخوا کے ضلع نوشہرہ میں پاکستان مسلم لیگ ن کے صوبائی رہنما نواب علی خان پر قاتلانہ حملہ ہوا ہے۔

پولیس کے مطابق پبی چراٹ روڈ پر نامعلوم موٹر سائیکل سواروں نے نواب علی خان کی گاڑی پر اندھا دھند فائرنگ کر دی جس میں وہ معجزانہ طور پر محفوظ رہے تاہم ان کا ایک گن مین شدید زخمی ہوا۔

پولیس کا کہنا ہے کہ گن مین منیب خان کو زخمی حالت میں لیڈی ریڈنگ ہسپتال پشاور منتقل کیا گیا جہاں وہ زخموں کی تاب نہ لاتے ہوئے چل بسے، میاں راشد مموریل ہسپتال پبی میں پوسٹ مارٹم کرنے کے بعد نعش ورثا کے حوالے کر دی گئی۔

نوشہرہ تھانہ پبی میں نواب علی خان کی مدعیت میں قتل، اقدام قتل کا مقدمہ درج کیا گیا۔

دوسری جانب پاکستان مسلم لیگ ن کے صوبائی ترجمان اختیار ولی نے پارٹی رہنماء پر قاتلانہ حملہ کی شدید الفاظ میں مذمت کی ہے۔