نوشہرہ: پولیس آپریشن میں کالعدم ٹی ٹی پی کا اہم رکن مارا گیا

نوشہرہ (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع نوشہرہ کے تھانہ نظام پور کی حدود میں پولیس کے ایک خصوصی آپریشن کے دوران کالعدم تحریک طالبان پاکستان (ٹی ٹی پی) کا ایک انتہائی مطلوب رکن ہلاک ہوگیا، جو پولیس اہلکار مقصود علی کی ہلاکت میں ملوث تھا۔

پولیس کے مطابق کارروائی گاؤں کاہی کے پہاڑی علاقے گڑنگ میں خفیہ اطلاع کی بنیاد پر کی گئی۔ آپریشن کے دوران پولیس اور مشتبہ شدت پسند کے درمیان فائرنگ کا تبادلہ ہوا جس کے نتیجے میں انتخاب عالم ولد نذر شاہ ہلاک ہوگیا۔

پولیس کا کہنا ہے کہ ملزم کالعدم ٹی ٹی پی کے مقامی نیٹ ورک سے وابستہ تھا اور اس کے خلاف قتل، اقدامِ قتل، اغوا اور دہشت گردی کے متعدد مقدمات درج تھے، جبکہ کارروائی کے دوران وہ سرکاری اسلحہ بھی برآمد کرلیا گیا جو پولیس اہلکار مقصود علی سے چھینا گیا تھا۔

یاد رہے کہ 15 اکتوبر کو تھانہ نظام پور کے علاقے میں پولیو ٹیم کی سیکیورٹی پر مامور پولیس اہلکار مقصود علی پر دہشت گردوں نے فائرنگ کی تھی، جس کے نتیجے میں وہ موقع پر ہی ہلاک ہوگئے تھے، جبکہ حملہ آور فرار ہونے میں کامیاب ہوگئے تھے۔

ضلعی پولیس سربراہ احمد شاہ نے جائے وقوعہ کا دورہ کرتے ہوئے آپریشن میں حصہ لینے والے اہلکاروں کی کارکردگی کو سراہا اور کہا کہ نوشہرہ پولیس شدت پسند عناصر کے خلاف کارروائیاں جاری رکھے گی۔