وزیراعلیٰ پنجاب کے ترجمان ڈاکٹر شہباز گل نے عہدے سے استعفیٰ دیدیا، عون چوہدری فارغ

لاہور (ڈیلی اردو) وزیراعلیٰ پنجاب کے ترجمان ڈاکٹر شہباز گل نے عہدے سے استعفیٰ دے دیا۔ ذرائع کے مطابق شہباز گل کو تقرر وتبادلوں پر اختلاف تھا۔

وزیراعلیٰ پنجاب کے مشیر سیاحت عون چوہدری کو بھی عہدے سے ہٹا دیا گیا۔ راولپنڈی سے تحریک انصاف کے سابق ٹکٹ ہولڈر آصف محمود کو وزیراعلیٰ کا مشیر تعینات کر دیا گیا ہے۔

اس کے علاوہ پنجاب حکومت میں وزیراعلیٰ کے مشیر عون چوہدری کو بھی عہدے سے ہٹادیا گیا ہے اور ان کی جگہ آصف محمود کو وزیراعلیٰ کا مشیر مقرر کیا گیا ہے جو مشیر برائے ہارٹی کلچر اور سیاحت کے طور پر کام کریں گے۔

وزیراعلیٰ پنجاب کے مشیر عون چوہدری کو ہٹانے اور آصف محمود کی تعیناتی کا نوٹی فکیشن بھی جاری کردیا گیا ہے۔

واضح رہےکہ شہباز گل پنجاب حکومت کے سرگرم ترجمان سمجھے جاتے تھے اور وہ ہر محاذ پر پنجاب حکومت اور وزیراعلیٰ عثمان بزدار کا دفاع کرتے نظر آتے تھے جب کہ گزشتہ روز ڈاکٹر شہباز گل نے ایک پریس کانفرنس بھی کی تھی جس میں انہوں نے کہا تھا کہ جسے عثمان بزدار کی شکل پسند نہیں تو وہ پارٹی چھوڑ دے۔

دوسری جانب عون چوہدری وزیراعظم عمران خان کے قریبی ساتھی سمجھے جاتے ہیں جنہیں پی ٹی آئی حکومت کے بعد وزیراعلیٰ پنجاب کا مشیر لگایا گیا تھا۔