وزیر خارجہ شاہ محمود قریشی تین روزہ دورے پر چین روانہ ہو گئے

اسلام آباد (ڈیلی اردو) وزیر خارجہ شاہ محمود قریشی تین روزہ دورے پر چین روانہ ہوگئے ہیں۔ شاہ محمود قریشی کا کہنا ہے کہ چینی وزیر خارجہ کے ساتھ اسٹریٹیجک ڈائیلاگ ہوں گے اور وزرائے خارجہ کی سطح پر پاک چین ڈائیلاگ کا انعقاد بھی پہلی مرتبہ ہوگا۔

دورہ چین پر روانگی سے قبل میڈیا سے گفتگو کرتے ہوئے وزیر خارجہ شاہ محمود قریشی نے کہا کہ آج سرکاری دورہ پر چین روانہ ہو رہا ہوں۔ میری چین کی قیادت سے ملاقاتیں ہوں گی۔

چین نہ صرف پاکستان کا بہترین دوست ہے بلکہ ہر مشکل وقت میں چین نے پاکستان کا ساتھ دیا ہے اور چین کا حالیہ فیصلہ بھی آپ کے سامنے ہے۔ ضرورت اس امر کی تھی کہ آئندہ آنے والے دنوں کے حوالے سے باہمی مشاورت کی جائے اور مشترکہ لائحہ عمل طے کیا جائے۔

انہوں نے مزید کہا کہ چین میں تھنک ٹینک گروپ کے ساتھ بھی رابطہ ہوگا اور وہاں میڈیا کے ساتھ بھی گفت و شنید ہوگی۔