ٹانک میں دہشت گردوں کی فائرنگ، چھٹی پر آیا پولیس اہلکار ہلاک

ٹانک (ڈیلی اردو) پاکستان کے شورش زدہ صوبہ خیبرپختونخوا کے ضلع ٹانک میں مسلح دہشت گردوں کی فائرنگ سے ایک پولیس اہلکار ہلاک ہو گیا۔

پولیس کے مطابق واقعہ اس وقت پیش آیا جب مسلح دہشت گردوں نے گھر کے باہر موجود پولیس اہلکار کو فائرنگ کا نشانہ بنایا۔

پولیس کا کہنا ہے کہ پولیس اہلکار حزب اللہ شدید زخمی حالت میں ہسپتال منتقل کیے گئے تاہم وہ زخموں کی تاب نہ لاتے ہوئے ہلاک ہو گئے۔

پولیس کے مطابق ہلاک ہونے والا اہلکار چھٹیوں پر گھر آیا ہوا تھا جب اسے نشانہ بنایا گیا۔

واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر شواہد اکٹھے کرنا شروع کر دیے ہیں جبکہ حملہ آور دہشت گردوں کی تلاش کے لیے کارروائیاں جاری ہیں۔