ٹانک میں فوجی چیک پوسٹ پر خودکش حملہ، 12 اہلکار ہلاک، 30 زخمی، مزید ہلاکتوں کا خدشہ

واشنگٹن (ش ح ط) پاکستان کے شورش زدہ صوبہ خیبر پختونخوا کے ضلع ٹانک میں پولیس اور سکیورٹی فورسز کی مشترکہ مانجھی خیل چیک پوسٹ پر خودکش حملے میں 12 اہلکار ہلاک جبکہ 30 کے قریب زخمی ہوگئے ہیں۔

ذرائع کے مطابق حملہ ٹانک کو ڈیرہ اسماعیل خان سے ملانے والی مرکزی شاہراہ پر واقع مانجھی خیل کی مشترکہ پولیس اور آرمی چوکی پر کیا گیا، جہاں بارود سے بھری گاڑی کے ذریعے خودکش حملہ کیا گیا۔

ابتدائی اطلاعات کے مطابق دھماکا انتہائی شدید تھا، جس کے نتیجے میں چیک پوسٹ کی عمارت مکمل طور پر تباہ ہوگئی۔

ذرائع نے بتایا کہ ہلاک ہونے والوں میں 9 فوجی اہلکار، 2 پولیس کانسٹیبل اور محکمہ جنگلات کا ایک ملازم شامل ہیں، جبکہ تقریباً 30 افراد زخمی ہوئے ہیں۔

زخمیوں میں سے بعض کو طبی امداد کے لیے کمبائنڈ ملٹری ہسپتال (سی ایم ایچ) اور ڈسٹرکٹ ہیڈکوارٹر ہسپتال (ڈی ایچ کیو) ڈیرہ اسماعیل خان منتقل کیا گیا ہے، جبکہ بعض زخمیوں کی حالت تشویشناک بتائی جاتی ہے۔

حکام کے مطابق شدید زخمی افراد کے باعث ہلاکتوں میں اضافے کا خدشہ ہے۔

حملے کے بعد سکیورٹی فورسز اور پولیس کی بھاری نفری جائے وقوعہ پر پہنچ گئی، علاقے کو گھیرے میں لے کر سرچ اور کلیئرنس آپریشن شروع کر دیا گیا ہے۔

کالعدم تحریک طالبان پاکستان (ٹی ٹی پی) نے حملے کی ذمہ داری قبول کرتے ہوئے دعویٰ کیا ہے کہ یہ کارروائی خودکش حملہ آور کے ذریعے کی گئی۔

حکام کے مطابق واقعے کی تحقیقات جاری ہیں، جبکہ مزید تفصیلات سامنے آنے کا انتظار ہے۔