ٹانک میں پولیس کی بکتر بند گاڑی پر دھماکا، افسر سمیت 2 اہلکار ہلاک، 2 زخمی

ٹانک (ڈیلی اردو) پاکستان کے شورش زدہ صوبہ خیبر پختونخوا کے ضلع ٹانک میں دہشت گردوں نے پولیس کی بکتر بند گاڑی کو بم دھماکے کا نشانہ بنایا، جس کے نتیجے میں ایک اسسٹنٹ سب انسپکٹر (اے ایس آئی) سمیت دو پولیس اہلکار ہلاک جبکہ دو اہلکار زخمی ہو گئے۔

پولیس کے مطابق واقعہ شاہراہِ وزیرستان پر مشا جان بنگلہ کے قریب پیش آیا، جہاں پولیس کی بکتر بند گاڑی معمول کے گشت پر تھی کہ سڑک کنارے نصب بارودی مواد (آئی ای ڈی) زور دار دھماکے سے پھٹ گیا۔

دھماکے کے نتیجے میں اے ایس آئی فرید اللہ اور سپاہی اختر زمان ہلاک ہو گئے، جبکہ سپاہی عبدالمالک اور قدرت اللہ زخمی ہوئے۔ زخمی اہلکاروں کو فوری طور پر ڈسٹرکٹ ہیڈکوارٹر ہسپتال ٹانک منتقل کیا گیا، جہاں انہیں طبی امداد فراہم کی جا رہی ہے۔

پولیس حکام کے مطابق دھماکے کے بعد پولیس اور دیگر قانون نافذ کرنے والے اداروں نے جائے وقوعہ کو گھیرے میں لے لیا، شواہد اکٹھے کیے جا رہے ہیں، جبکہ حملہ آوروں کی گرفتاری کے لیے علاقے میں سرچ آپریشن شروع کر دیا گیا ہے۔

تاحال کسی شدت پسند گروپ نے حملے کی ذمہ داری قبول نہیں کی، تاہم واقعے کی تحقیقات جاری ہیں۔

خیبر پختونخوا کے جنوبی اضلاع، خصوصاً ٹانک، ڈیرہ اسماعیل خان اور ملحقہ علاقوں میں حالیہ مہینوں کے دوران سکیورٹی فورسز اور پولیس اہلکاروں پر حملوں میں اضافہ دیکھا گیا ہے۔ 

حکام کا کہنا ہے کہ دہشت گرد عناصر کے خلاف کارروائیاں مزید تیز کی جا رہی ہیں۔