ٹرمپ کا ایران پر معاشی دباؤ بڑھانے کا اعلان، معاون ممالک کو بھی خبردار کردیا

واشنگٹن(ڈیلی اردو) امریکی صدر ڈونلڈ ٹرمپ نے ایران کے خلاف سخت معاشی اقدامات کا اعلان کرتے ہوئے کہا ہے کہ تہران کو مزید تنہائی اور اقتصادی دباؤ کا سامنا کرنا پڑے گا، جبکہ ایران کی مدد کرنے والے ممالک کو بھی سنگین معاشی نتائج بھگتنا پڑ سکتے ہیں۔

ٹرمپ نے سوشل میڈیا پر جاری بیان میں کہا کہ ایران کو معاہدے تک پہنچنے کے لیے دیگر ممالک کے مقابلے میں زیادہ مواقع دیے گئے، تاہم تہران نے ان مواقع سے فائدہ نہیں اٹھایا۔

امریکی صدر کے مطابق ایران کی بحری اور فضائی صلاحیتوں کو نقصان پہنچا ہے، جبکہ فوجی تنصیبات بھی متاثر ہوئی ہیں اور ملکی معیشت دباؤ کا شکار ہے۔

ٹرمپ نے ایران کے خلاف تیل کی اسمگلنگ، مالیاتی لین دین، نقد رقوم کی منتقلی، ایکسچینج ہاؤسز، شپ رجسٹریوں اور ان کمپنیوں کے خلاف کارروائی پر زور دیا جو مبینہ طور پر تہران کی معاونت کے لیے استعمال ہو رہی ہیں۔

انہوں نے کہا کہ امریکا اپنے اتحادیوں کے ساتھ مل کر ایران کو اقتصادی طور پر تنہا کرنے کی کوشش کرے گا اور اس اقدام کو ’’Economic D-Day‘‘ قرار دیا۔

امریکی صدر نے ایک بار پھر واضح کیا کہ امریکا ایران کو جوہری ہتھیار حاصل کرنے کی اجازت نہیں دے گا۔