پاراچنار: بارودی سرنگ کا دھماکہ، شہری شدید زخمی

پاراچنار(ڈیلی اردو) خیبرپختونخواہ کے شورش زدہ ضلع کرم کے پاک افغان سرحد سے متصل علاقے پیواڑ میں بارودی سرنگ کے دھماکے سے ایک شہری شدید زخمی ہوگیا، جسے طبی امداد کے لیے ڈی ایچ کیو اسپتال پاراچنار منتقل کردیا گیا۔

مقامی ذرائع کے مطابق گلزار حسین نامی شخص گھر سے کھیتوں کی جانب جارہا تھا کہ راستے میں موجود بارودی سرنگ پر پاؤں پڑنے سے زوردار دھماکہ ہوگیا۔ دھماکے کے نتیجے میں وہ شدید زخمی ہوا اور اس کے ایک پاؤں کو سنگین نقصان پہنچا۔

واقعے کے بعد زخمی کو فوری طور پر اسپتال منتقل کیا گیا، جہاں اسے طبی امداد فراہم کی جارہی ہے۔

اہل علاقہ کا کہنا ہے کہ پاک افغان سرحدی علاقوں میں بارودی سرنگوں کی موجودگی شہریوں کے لیے مسلسل خطرہ بنی ہوئی ہے۔ انہوں نے متعلقہ حکام سے علاقے کی مکمل صفائی اور بارودی مواد کو تلف کرنے کے لیے مؤثر اقدامات کا مطالبہ کیا ہے۔