پاکستانی فضائی حملوں میں افغانستان میں 26 دہشت گرد ہلاک

اسلام آباد (ڈیلی اردو/نیوز ایجنسیاں) پاکستانی حکومت کے مطابق بدھ کے روز افغانستان کے سرحدی علاقوں میں کیے گئے فضائی حملوں میں 26  عسکریت پسند ہلاک ہو گئے۔ 

وزیر اطلاعات عطاء اللہ تارڑ نے سوشل میڈیا پلیٹ فارم ایکس پر ایک بیان میں  کہا کہ حالیہ دہشت گردی کے واقعات کے بعد پاکستان اور افغانستان کی سرحد کے قریب دہشت گردوں کے ٹھکانوں اور محفوظ پناہ گاہوں کو نشانہ بناتے ہوئے ’’انتہائی درست اور محدود نوعیت کے حملے‘‘ کیے گئے۔ 

ان کے مطابق ان کارروائیوں میں کالعدم تحریک طالبان پاکستان (ٹی ٹی پی) سے وابستہ 26 شدت پسند مارے گئے۔

دوسری جانب افغان حکام، جو اس بات کی تردید کرتے ہیں کہ افغانستان کی سرزمین عسکریت پسندی کے لیے استعمال ہو رہی ہے، کا کہنا ہے کہ  پاکستان کی جانب سے کیے گئے ان حملوں میں 13 افراد ہلاک ہوئے، جن میں بچے بھی شامل ہیں۔ 

افغانستان میں طالبان حکومت کے ترجمان ذبیح اللہ مجاہد نے کہا کہ تازہ ترین فضائی حملوں میں افغان صوبوں خوست، کنڑ اور پکتیکا کو نشانہ بنایا گیا جس کے نتیجے میں 11 بچے، ایک عورت اور ایک عمر رسیدہ شخص ہلاک ہوئے۔ 

پاکستانی وزیر اطلاعات نے ان شہری ہلاکتوں کے حوالے سے کوئی تبصرہ نہیں کیا۔