پاکستانی فورسز اور افغان طالبان کے درمیان سرحدی علاقوں میں جھڑپیں

کوئٹہ (ڈیلی اردو) پاکستان اور افغانستان کے سرحدی علاقوں میں پاکستانی سکیورٹی فورسز اور افغان طالبان کے درمیان جھڑپوں کی اطلاعات سامنے آئی ہیں۔

سرکاری حکام کے مطابق بلوچستان کے ضلع چمن سے متصل سرحدی علاقوں میں دونوں جانب سے فائرنگ کا تبادلہ ہوا، جو وقفے وقفے سے دوپہر تک جاری رہا۔

حکام کا کہنا ہے کہ جھڑپوں کا آغاز صبح کے وقت چمن کے قریب روغانی کے علاقے میں ہوا۔ تاہم تاحال کسی جانی نقصان یا جھڑپوں کی اصل وجہ کے بارے میں باضابطہ تفصیلات سامنے نہیں آئیں۔

اسی طرح خیبر پختونخوا کے قبائلی ضلع باجوڑ میں بھی پاک افغان سرحد سے متصل علاقوں میں فائرنگ اور دھماکوں کی آوازیں سنی گئیں۔ مقامی افراد کے مطابق گولے آبادی کے قریب گرے، تاہم فوری طور پر کسی جانی نقصان کی تصدیق نہیں ہو سکی۔

مقامی ذرائع کا کہنا ہے کہ لغڑئی، چارمنگ اور سلارزئی کے علاقوں میں شدید فائرنگ اور گولہ باری کی آوازیں سنائی دیتی رہیں، جس سے علاقے میں خوف و ہراس پھیل گیا۔

تاحال دونوں فریقین کی جانب سے باضابطہ مؤقف یا نقصانات کی تفصیلات سامنے نہیں آئیں۔