پاکستان افغان طالبان سے بات چیت کیلئے تیار، پہلے دہشت گرد ہمارے حوالے کرو، ڈی جی آئی ایس پی آر

اسلام آباد (ڈیلی اردو) پاکستان کے نجی ٹی وی چینل جیو نیوز کے مطابق، کیپٹل ٹاک کے میزبان حامد میر سے گفتگو میں ڈی جی آئی ایس پی آر لیفٹیننٹ جنرل احمد شریف چوہدری نے کہا ہے کہ پاکستان افغان طالبان کے ساتھ بات چیت کے لیے تیار ہے، لیکن اس سے پہلے طالبان کو اپنے قبضے میں موجود دہشت گرد پاکستان کے حوالے کرنے ہوں گے۔ 

انہوں نے کہا کہ افغان طالبان کو فیصلہ کرنا ہے کہ ان کے لیے ٹی ٹی پی اہم ہے یا پاکستان، اور ان کے لیے دہشت گردی اہم ہے یا امن۔

ڈی جی آئی ایس پی آر نے بتایا کہ کابل میں ہدف افغان طالبان کے گولہ بارود، ہتھیاروں اور ڈرون طیاروں کا ڈپو تھا، اور گولہ بارود پھٹنے سے جو دھماکے ہوئے انہیں پورے شہر نے دیکھا۔ انہوں نے واضح کیا کہ حملے میں سویلینز کی ہلاکتوں کا پراپیگنڈہ جھوٹ ہے، کیونکہ طالبان کے اکثر جنگجو وردی نہیں بلکہ سویلین لباس پہنتے ہیں۔

جیو نیوز کے مطابق، انہوں نے کہا کہ طالبان منشیات کے عادی افراد کو خودکش حملوں کے لیے بھی استعمال کرتے ہیں، اور پاکستان کے خلاف استعمال ہونے والے ڈرون افغان طالبان کو بھارت فراہم کر رہا ہے۔

ڈی جی آئی ایس پی آر نے کہا کہ پاکستان کا افغان عوام سے کوئی مسئلہ نہیں، مسئلہ طالبان اور دہشت گردوں سے ہے، اور افغان عوام خود اس رجیم اور دہشت گردوں کے ظلم کا شکار ہیں۔ پاکستان نے کابل میں دہشت گردوں کے ٹھکانوں اور انفراسٹرکچر کو نشانہ بنایا ہے، جبکہ افغان طالبان جھوٹے دعوے کرتے ہیں اور بعد میں پوسٹس ڈیلیٹ کر دیتے ہیں۔

انہوں نے مزید کہا کہ پاکستان نے اب تک 81 مقامات پر اسٹرائیک کی ہیں، جن میں صرف دہشت گردوں کو سپورٹ کرنے والے انفراسٹرکچر کو نشانہ بنایا گیا، اور دہشت گردی کے خلاف جنگ صرف پاکستان ہی نہیں بلکہ خطے اور دنیا کی جنگ ہے۔