پاکستان اور ایران دہشت گردی کے خلاف تعاون بڑھانے پر متفق

راولپنڈی (نمائندہ ڈیلی اردو) ایران کی سپریم نیشنل سکیورٹی کونسل کے سیکریٹری علی اردشیر لاریجانی نے جی ایچ کیو راولپنڈی میں پاکستانی آرمی چیف فیلڈ مارشل سید عاصم منیر سے ملاقات کی، جس میں دوطرفہ تعاون، علاقائی سکیورٹی اور پاکستان و ایران کے تعلقات کو مزید مضبوط بنانے پر بات چیت کی گئی۔ 

پاکستانی آرمی چیف نے علاقائی امن و استحکام کے لیے پاکستان کے عزم کا اعادہ کرتے ہوئے ایران کے ساتھ دہشت گردی کے خلاف قریبی تعاون کی ضرورت پر زور دیا اور بدلتی ہوئی جغرافیائی سیاسی صورتِ حال میں اسٹریٹجک تعاون کی بڑھتی ہوئی اہمیت اجاگر کی۔ 

علی لاریجانی نے خطے میں امن و سلامتی کے لیے پاکستان کے کردار کو سراہا اور ایران-پاکستان تعلقات کو مضبوط کرنے کے عزم کا اظہار کیا۔ 

انہوں نے دونوں ممالک کے درمیان مکالمے اور شراکت داری کو علاقائی چیلنجز سے نمٹنے اور دیرپا استحکام کے لیے ضروری قرار دیا۔ علی لاریجانی پاکستان کے سرکاری دورے پر ہیں اور گزشتہ روز انہوں نے وزیر اعظم شہباز شریف سے بھی ملاقات کی تھی، جس میں خطے میں امن و استحکام کے فروغ کے لیے مربوط کوششوں پر تبادلہ خیال کیا گیا۔