پاکستان میں آج عیدالفطر سادگی سے منائی جارہی ہے

اسلام آباد (ڈیلی اردو) ملک بھر میں عیدالفطر سادگی سے منائی جارہی ہے۔ ملک کے ہر چھوٹے بڑے شہر گاؤں، دیہاتوں میں نماز عید کے چھوٹے بڑے اجتماعات منعقد ہوئے جس میں ملکی سلامتی و استحکام اور کورونا کے خاتمے کیلئے خصوصی دعائیں کی گئیں۔

تفصیلات کے مطابق عید الفطر کے موقع ملک بھر میں نماز عید کے چھوٹے بڑے اجتماعات ہوئے جس میں لوگوں کی بڑی تعداد شریک ہوئی۔ کہیں سماجی فاصلے کا خیال رکھا گیا، کہیں نہیں جبکہ سیکیورٹی کے سخت انتظامات کئے گئے تھے۔

ملک بھر میں عید الفطر کے موقع پر مساجد، عید گاہ اور امام بارگاہوں میں نماز عید کے چھوٹے بڑے اجتماعات ہوئے، علمائے کرام نے عید کے خطبات میں اسلامی تعلیمات اور رمضان المبارک کی فضیلت بیان کی۔

نماز کے اجتماعات میں افسوسناک طیارہ حادثے کے ہلاک ہونے والے افراد کی مغفرت، کورونا وائرس سے نجات ملکی ترقی خوشحالی اور سلامتی کے لئے خصوصی دعائیں کی گئیں۔

علمائے کرام نے غم کے اس لمحے دنیا سے رخصت ہو جانے والوں کے لواحقین کے لیے صبر جمیل اور زخمی اور بیماروں کے لیے دعائے صحت کی جب کہ نماز کے بعد لوگوں نے عید کے بعد ایک دوسرے کو مبارکباد دی اور نیک جذبات کا اظہار کیا۔

 کراچی میں بھی عیدالفطر سادگی سے منائی جارہی ہے اور  شہر کی مساجد اور عید گاہوں میں نماز عید ادا کی گئی جس کے بعد لوگوں نے ایک دوسرے کو عید کی مبارک باد دی۔

اسلام آباد میں عید کا سب سے بڑا اجتماع شاہ فیصل مسجد جب کہ راولپنڈی میں لیاقت باغ میں ہوا جہاں نمازیوں کی بڑی تعداد نے شرکت کی۔

لاہور  کی 5 ہزار مساجد اور 190 سے زائد کھلے مقامات پر نماز عید ادا کی گئی اور اس دوران کورونا سے حفاظتی انتظامات کیلئے ایس او پیز پر مکمل عملدرآمد کیا گیا۔

عید کے اجتماعات میں سینیٹائزر کے استعمال اور سماجی فاصلے کا خاص خیال رکھا گیا۔

اس موقع پر سیکیورٹی کے خصوصی انتظامات کیے گئے اور کورونا وائرس سے بچاؤ کی احتیاطی تدابیر کو بھی مدنظر رکھا گیا۔

کوئٹہ اور گردونواح میں 300 سے زائد مقامات پر نماز عیدالفطر کے اجتماعات ہوئے جب کہ شہر میں نماز عید کا سب سے بڑا اجتماع مرکزی عیدگاہ طوغی روڈ پر منعقد ہوا۔

مرکزی عیدگاہ میں نمازعید کی امامت مرکزی خطیب مولانا انوارالحق حقانی نے کی اور وہاں بھی اس  موقع پر کورونا وائرس کے حوالے سےاحتیاطی تدابیر پر بھی عملدرآمد کو یقینی بنایا گیا۔

 اس موقع پر طیارہ حادثے میں ہلاک ہونے والوں کی مغفرت کے لیے کورونا سے نجات ملکی سلامتی ترقی اور خوش حالی کے لیے خصوصی دعائیں کی گئیں۔

پشاور میں مرکزی عید گاہ چارسدہ روڈ میں نماز عید ادا کردی گئی جہاں مولانا محمد اسماعیل نے امامت کی جب کہ دیگر مساجد میں بھی نماز عید کی ادائیگی، کورونا کےخاتمے اور متاثرین سانحہ کراچی کے لیے خصوصی دعا کی گئی۔