پاکستان کے زیرِ انتظام کشمیر میں لائن آف کنٹرول کے قریب دھماکہ، 4 نوجوان ہلاک

مظفرآباد(ڈیلی اردو) پاکستان کے زیرِ انتظام کشمیر کے ضلع پونچھ کی تحصیل ہجیرہ کے سرحدی علاقے مہنڈلہ مدارپور میں دھماکے کے نتیجے میں 4 نوجوان ہلاک ہوگئے۔ واقعہ لائن آف کنٹرول کے قریب زیرو لائن کے مقام پر پیش آیا، جہاں نوجوان پانی کی پائپ لائن کی مرمت میں مصروف تھے۔

مقامی رہائشی صغیر احمد کے مطابق نوجوان پائپ لائن کی مرمت کررہے تھے کہ اچانک دھماکہ ہوگیا، جس کے نتیجے میں چاروں موقع پر ہی ہلاک ہوگئے۔ ہلاک ہونے والوں کی شناخت سردار فیضان صغیر، سردار اشتیاق، سردار عاصم رفیق اور سردار وقاص شریف کے ناموں سے ہوئی ہے۔ ان کی عمریں 20 سے 30 سال کے درمیان بتائی گئی ہیں۔

ڈپٹی کمشنر راجہ صداقت نے واقعے کی تصدیق کرتے ہوئے بتایا کہ دھماکہ مدارپور میں لائن آف کنٹرول کے قریب ہوا۔ ان کے مطابق واقعے کی تحقیقات جاری ہیں اور تاحال یہ واضح نہیں ہوسکا کہ دھماکہ بارودی سرنگ پھٹنے سے ہوا یا اس کی کوئی دوسری وجہ تھی۔ حکام کا کہنا ہے کہ تحقیقات مکمل ہونے کے بعد ہی دھماکے کی اصل نوعیت معلوم ہوسکے گی۔