پاک-امریکا فوجی مشقیں: دہشت گردی سے نمٹنے میں دو طرفہ تعاون کو مضبوط کرنے کا مظاہرہ

راولپنڈی (ڈیلی اردو) پاکستان اور امریکا کی افواج کی مشترکہ مشق انسپائرڈ گمبٹ 2026 میں شرکاء نے اعلیٰ سطح کی پیشہ ورانہ مہارت کا مظاہرہ کیا۔

آئی ایس پی آر کے مطابق یہ مشق 8 جنوری سے شروع ہوئی اور 16 جنوری تک جاری رہے گی۔ جمعرات کو نیشنل کاؤنٹر ٹیررازم سینٹر پبی میں مشق کے حوالے سے معزز مہمانوں کے لیے تقریب بھی منعقد کی گئی۔

تقریب میں امریکا کی ناظم الامور نیٹلی اے بیکر اور سینئر امریکی فوجی شخصیات نے شرکت کی۔ آئی ایس پی آر کے مطابق مہمانوں کو مشق کے اہداف، اہمیت اور انعقاد کے حوالے سے بریف کیا گیا، اور دونوں ملکوں کی افواج کے شرکاء کی اعلیٰ پیشہ ورانہ مہارت کو سراہا گیا۔

مشق کا مقصد دہشت گردی سے نمٹنے کے تجربات کے ذریعے دو طرفہ فوجی تعاون کو مضبوط کرنا اور دہشت گردی سے نمٹنے کی مشقوں اور طریقہ کار کو مزید موثر بنانا ہے۔ 

آئی ایس پی آر کے مطابق یہ مشق دونوں ملکوں کے درمیان باہمی ہم آہنگی کی صلاحیت کو فروغ دینے اور فوجی تعاون کو مستحکم کرنے میں بھی مددگار ہے۔