پشاور: پولیس مقابلے میں ٹارگٹ کلرز کے سرغنہ نجمل الحسن سمیت پانچ حملہ آور ہلاک

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا میں صوبائی حکومت کے مطابق پشاور کے علاقے داودزئی میں پولیس کے ساتھ ایک جھڑپ میں ٹارگٹ کلرز کے سرغنہ سمیت پانچ حملہ آور ہلاک ہو گئے۔

سی سی پی او پشاور میاں سعید کے مطابق ہلاک ہونے والا ٹارگٹ کلرز گینگ پولیس پر حملے کی منصوبہ بندی کر رہا تھا۔ سی سی پی او نے بتایا کہ یہ ملزمان اس سے قبل دو پولیس اہلکاروں کو ہلاک کر چکے تھے۔ گینگ کا سرغنہ نجمل الحسن تھا، جس نے ایک ویڈیو بیان میں پولیس کانسٹیبل کو ہلاک کرنے کا اعتراف بھی کیا تھا۔

پولیس کے مطابق یہ ٹارگٹ کلرز گینگ پشاور، نوشہرہ، چارسدہ اور درہ آدم خیل میں مجموعی طور پر 30 سے زائد وارداتوں میں ملوث رہا۔ ملزمان پشاور میں 12 جبکہ نوشہرہ میں 17 افراد کے ہلاک ہونے میں ملوث تھے۔

سی سی پی او نے بتایا کہ ہلاک ملزمان نے چارسدہ اور درہ آدم خیل میں ایک، ایک شخص کو ہلاک کیا تھا۔ اس کے علاوہ گینگ عوامی نیشنل پارٹی کے رہنما مومن خان اور ان کے بھائی کی ٹارگٹ کلنگ میں بھی ملوث رہا۔

میاں سعید کے مطابق ملزمان نے ایک خواجہ سرا کو فائرنگ کر کے زخمی بھی کیا تھا۔ پولیس کا کہنا ہے کہ ہلاک ٹارگٹ کلرز کے خلاف مختلف سنگین مقدمات درج تھے اور واقعے سے متعلق مزید قانونی کارروائی جاری ہے۔