پشاور کے علاقے حسن خیل میں جھڑپ؛ 5 دہشت گرد اور کیپٹن سمیت دو سیکیورٹی اہلکار ہلاک

پشاور (ڈیلی اردو) صوبہ خیبر پختونخوا کے صوبائی حکومت پشاور کے مضافاتی علاقے حسن خیل میں سکیورٹی فورسز اور دہشت گردوں کے درمیان ہونے والی ایک جھڑپ میں کالعدم تحریک طالبان پاکستان کا اہم کمانڈر عبدالرحیم سمیت 5 دہشت گرد اور کیپٹن حسین جہانگیر سمیت 2 سکیورٹی اہلکار ہلاک ہوگئے ہیں۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق دہشتگردوں کی مبینہ موجودگی کی اطلاع پر آپریشن کیا گیا، سیکیورٹی فورسز نے مؤثر انداز میں دہشتگردوں کے ٹھکانوں کو نشانہ بنایا، آپریشن کے دوران 3 دہشتگرد زخمی بھی ہوئے۔

آئی ایس پی آر نے کہا کہ فائرنگ کے تبادلے میں کیپٹن حسین جہانگیر اور حولدار شفیق اللہ شہید ہو گئے، علاقے میں ممکنہ دہشتگردوں کے خاتمےکے لیےکلیئرنس آپریشن جاری ہے۔

آئی ایس پی آر نے بتایا کہ سیکیورٹی فورسز وطن سے دہشتگردی کے خاتمے کے لیے پر عزم ہیں، جوانوں کی قربانیاں ہمارے عزم کو مزید تقویت دیتی ہیں۔

آئی ایس پی آر کے مطابق پشاور کےعلاقے حسن خیل میں دوران آپریشن شہید ہونے والے کیپٹن حسن جہانگیر کی نماز جنازہ ادا کردی گئی، حوالدار شفیق اللہ شہید کی بھی نماز جنازہ پشاور گیریژن میں ادا کردی گئی، نماز جنازہ میں کور کمانڈر پشاور، پاک فوج کےافسران، سول حکام، عوام، اور جوانوں نے شرکت کی، شہدا کے جسد خاکی ان کے آبائی علاقوں میں روانہ کردیے گئے، شہدا کو مکمل فوجی اعزاز کے ساتھ سپرد خاک کیا جائے گا، مسلح افواج قوم کے شانہ بشانہ دہشت گردی کےخاتمےکے لیے پر عزم ہے۔