پنجاب: ساہیوال سے بھارتی خفیہ ایجنسی ’را‘ کا مبینہ ایجنٹ گرفتار، بارودی مواد برآمد

لاہور (نمائندہ ڈیلی اردو) پاکستان کے صوبہ پنجاب کے ضلع ساہیوال میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے بھارتی خفیہ ایجنسی "را" سے مبینہ طور پر وابستہ ایک مشتبہ شخص کو گرفتار کرنے کا دعویٰ کیا ہے۔

سی ٹی ڈی ذرائع کے مطابق گرفتار ملزم کی شناخت روز علی خان کے نام سے ہوئی ہے، جو ارمڑ میانہ، ضلع پشاور، خیبر پختونخوا کا رہائشی بتایا جاتا ہے۔ حکام کا کہنا ہے کہ ملزم پر بھارتی خفیہ ایجنسی "را" کے لیے جاسوسی اور تخریبی سرگرمیوں میں ملوث ہونے کا الزام ہے۔

سی ٹی ڈی کے مطابق ملزم کے قبضے سے بارودی مواد، ایک پرائما کارڈ، ڈیٹونیٹر، برقی تار، تین بیٹریاں اور دو موبائل فون برآمد کیے گئے ہیں۔

حکام کا کہنا ہے کہ ملزم اوکاڑہ کے فیصل آباد روڈ پر واقع کوہ نور سٹی کے علاقے میں مبینہ طور پر حساس تنصیبات کو نشانہ بنانے کی غرض سے موجود تھا، جہاں کارروائی کے دوران اسے گرفتار کر لیا گیا۔

سی ٹی ڈی نے واقعے کی مزید تفتیش شروع کر دی ہے تاکہ ملزم کے مبینہ نیٹ ورک اور ممکنہ سہولت کاروں سے متعلق معلومات حاصل کی جا سکیں۔