پنجاب: لیہ میں پولیس اہلکار کی مسجد کے باہر ٹارگٹ کلنگ، اسلحہ بھی چھین لیا گیا

لاہور (نمائندہ ڈیلی اردو) پاکستان کے صوبہ پنجاب کے شہر لیہ میں جامع مسجد نوری ہیرا اڈہ کے باہر سکیورٹی ڈیوٹی پر مامور پولیس کانسٹیبل اسد نصیر کو نامعلوم دہشت گردوں نے فائرنگ کرکے ہلاک کر دیا اور ان کا سرکاری اسلحہ بھی چھین لیا۔

پولیس کے مطابق کانسٹیبل مسجد میں تراویح کے دوران ڈیوٹی انجام دے رہا تھا کہ دو موٹر سائیکل سوار دہشت گرد اچانک اس پر فائرنگ کر کے فرار ہو گئے۔

واقعہ کی اطلاع ملنے پر ڈی پی او لیہ حسن جاوید سمیت پولیس کے اعلیٰ افسران موقع پر پہنچے اور شواہد اکٹھے کرنے کے بعد ملزمان کی گرفتاری کے لیے سرچ آپریشن شروع کر دیا گیا۔

ہلاک ہونے والے کانسٹیبل کی لاش پوسٹ مارٹم کے لیے مقامی ہسپتال منتقل کر دی گئی ہے، اور تفتیش جاری ہے۔