پنجاب: کالعدم ٹی ایل پی کے 507 مدارس و مساجد تنظیم المدارس اہلسنت کے حوالے

لاہور (ڈیلی اردو) پنجاب میں کالعدم تحریک لبیک پاکستان (ٹی ایل پی) کے 177 مدارس اور 330 مساجد کو مرحلہ وار تنظیم المدارس اہلسنت پاکستان کے حوالے کرنے کے لیے صوبائی حکومت اور تنظیم کے درمیان معاہدہ طے پا گیا ہے۔

دستاویزات کے مطابق ناظم اعلی تنظیم المدارس اہلسنت پاکستان کے صاحبزادہ عبد المصطفیٰ ہزاروی نے حکومت پنجاب کو یقین دہانی کروائی ہے کہ صوبے میں ان مدارس کا انتظام و انصرام قبول کرتے ہوئے طے شدہ شرائط کی مکمل پاسداری کی جائے گی۔

معاہدے کی شرائط کے مطابق: تمام مدارس ملکی سلامتی، معاشرتی امن اور استحکام کے پابند ہوں گے۔

مدارس خود کو ہر قسم کی شرپسندی یا غیر قانونی سرگرمی سے دور رکھیں گے۔

مینجمنٹ، فیکلٹی اور طلبہ میں کسی مشکوک یا دہشت گرد سرگرمی میں ملوث افراد کے لیے کوئی جگہ نہیں ہوگی۔

ادارے ریاستی قوانین اور پالیسیوں کی مکمل تعمیل کریں گے اور کسی خلاف ورزی کی صورت میں حکومت قانونی کارروائی کرے گی۔

تنظیم المدارس نے اپنے تحت لیے جانے والے مدارس کے مہتمم، ناظم اعلی اور سربراہان کو اقرار نامے پر دستخط کرنے کی ہدایت بھی دی ہے، جس میں وہ یہ یقین دہانی کریں گے کہ ان کے ادارے میں ملکی و قومی سلامتی کے منافی کوئی سرگرمی نہیں ہوگی اور کسی قسم کی شرپسندی میں ملوث نہیں ہوں گے۔

معاہدے کے مطابق، تمام مدارس اپنے طلبہ و طالبات کو قانون کی پاسداری اور حب الوطنی کا درس دیں گے اور کسی بھی خلاف ورزی کی صورت میں تنظیم کو قانونی و انضباطی کارروائی کا حق حاصل ہوگا۔