پینٹاگون کی ایران کے خلاف بڑے فوجی آپریشن کی تیاری مکمل کرنے کی ہدایت، فضائی حملوں کا امکان

واشنگٹن (ڈیلی اردو) امریکی محکمہ دفاع پینٹاگون نے ایران کے خلاف بڑے پیمانے پر فوجی کارروائیاں دوبارہ شروع کرنے کے ممکنہ فیصلے کے پیش نظر امریکی فوج کو آپریشنل تیاریاں مکمل رکھنے کی ہدایت کی ہے۔ امریکی حکام کے مطابق مشرق وسطیٰ میں اضافی فوجی وسائل اور عسکری سازوسامان کی تعیناتی سمیت مختلف آپشنز پر کام جاری ہے، جبکہ ممکنہ کارروائی میں بڑے پیمانے پر فضائی حملے بھی شامل ہو سکتے ہیں۔

امریکی خبر رساں ویب سائٹ ایگزیوس (Axios) کی رپورٹ کے مطابق امریکی فوجی حکام ممکنہ طور پر ایران کے خلاف بڑے فوجی آپریشن کی بحالی کے لیے منصوبہ بندی کر رہے ہیں۔ ممکنہ اہداف میں ایران کی جوہری تنصیبات، توانائی کے مراکز اور اہم فوجی و بنیادی ڈھانچے کی تنصیبات شامل ہو سکتی ہیں۔ اس کارروائی میں اسرائیلی فوج کی شرکت کا امکان بھی ظاہر کیا گیا ہے۔

تاہم امریکی حکام نے واضح کیا ہے کہ فوج کو تیاری مکمل رکھنے کی ہدایت کا مطلب یہ نہیں کہ صدر ڈونلڈ ٹرمپ نے دوبارہ جنگ شروع کرنے کا حتمی فیصلہ کر لیا ہے۔ فوجی آپریشن کے آغاز کے لیے کوئی تاریخ بھی مقرر نہیں کی گئی۔

امریکی نائب صدر جے ڈی وینس نے ایران کے خلاف جنگ پر تنقید کرتے ہوئے کہا ہے کہ اس تنازع نے ریپبلکن جماعت کو وسط مدتی انتخابات میں نقصان پہنچایا۔ صدر ٹرمپ نے اس مؤقف سے اتفاق کے بعض پہلوؤں کو تسلیم کیا، تاہم دفاع کرتے ہوئے کہا کہ ایران کو جوہری ہتھیار حاصل کرنے سے روکنا ضروری تھا۔ امریکی حکام کے مطابق ٹرمپ کو ایران کے خلاف دوبارہ حملوں کے مختلف فوجی منصوبوں پر بریفنگ بھی دی جا چکی ہے۔

دوسری جانب قطر کی ثالثی میں واشنگٹن اور تہران کے درمیان مذاکرات بحال کرنے اور ممکنہ جنگ بندی کے لیے کوششیں جاری ہیں۔ ان مذاکرات میں آبنائے ہرمز کو دوبارہ کھولنے اور براہ راست بات چیت شروع کرنے کی تجاویز بھی زیر غور ہیں۔ ایران نے بھی امریکی حملوں کی صورت میں جوابی کارروائی کی تیاری کا عندیہ دیا ہے، جبکہ پاکستان اور قطر سفارتی رابطوں میں کردار ادا کر رہے ہیں۔