پی ٹی ایم کے حق میں ملالہ یوسفزئی کے والد بھی میدان میں آ گئے، اہم بیان دے دیا

اسلام آباد (ڈیلی اردو) شمالی وزیرستان کے علاقے بویہ میں خڑ قمر چیک پوسٹ پر حملے سے متعلق ملالہ یوسفزئی کے والد نے تشویش کا اظہار کیا ہے۔

تفصیلات کے مطابق ملالہ یوسفزئی کے والد ضیاالدین یوسفزئی نے ٹویٹر پر پیغام جاری کرتے ہوئے کہا کہ ”میں شمالی وزیرستان میں پی ٹی ایم کے پرامن کارواں پر گھناﺅنے حملے کی مذمت کرتا ہوں، اس سے پہلے کہ بہت دیر ہو جائے، وزیراعظم عمران خان اور آرمی چیف قمر جاوید باجوہ اس کا نوٹس لیں ۔“

I strongly condemn the heinous attack on PTM’s peaceful caravan in Waziristan. Before it is too late, MP Imran khan and COAS General Qamar Bajwa should take notice of the tragic incident. @ImranKhanPTI #Waziristan

— Ziauddin Yousafzai (@ZiauddinY) May 26, 2019

واضح رہے کہ آئی ایس پی آر کی جانب سے جاری کردہ بیان میں بتایا گیا تھا کہ پی ٹی ایم کے رہنما محسن داوڑ اور علی وزیر نے اتوار کے روز شمالی وزیر ستان کے علاقے یویہ میں پاک فوج کی چیک پوسٹ پر گروہ کے ہمراہ حملہ کیا اور فائرنگ کی جس کے نتیجے میں پانچ اہلکار زخمی ہوئے۔

تاہم جوابی کارروائی میں تین کارکن جاں بحق ہوگئے جبکہ علی وزیر اور دیگر ساتھیوں کو گرفتار کر لیا گیا ہے جبکہ آئی ایس پی آر کی جانب سے جاری کردہ بیان میں بتایا گیا تھا کہ محسن داوڑ لوگوں کو موقع پر اکسانے کے بعد وہاں سے فرار ہو گیا۔