چارسدہ: دہشت گردانہ حملے میں جے یو آئی کے صوبائی رہنما مولانا عبدالسلام ہلاک

چارسدہ (نمائندہ ڈیلی اردو) پاکستان کے شورش زدہ صوبے خیبر پختونخوا کے شورش زدہ ضلع چارسدہ میں نامعلوم موٹرسائیکل سواروں کی فائرنگ سے جمعیت علمائے اسلام (ف) کی صوبائی شوریٰ کے رکن مولانا عبدالسلام ہلاک ہو گئے ہیں۔

پولیس کے مطابق واقعہ تھانہ مندنی کی حدود مندنی ٹو تخت بھائی روڈ پر پیش آیا، جہاں نامعلوم حملہ آوروں نے فائرنگ کر کے مولانا عبدالسلام کو نشانہ بنایا اور فرار ہو گئے۔

ڈیلی اردو کے مطابق مقتول مولانا عبدالسلام تحصیل تنگی کے علاقے اینگر باڑی بند کے مدرسہ ابوبکر صدیق کے مہتمم اور جے یو آئی (ف) کی صوبائی شوریٰ کے رکن تھے۔ 

پولیس کا کہنا ہے کہ واقعے کی تحقیقات مختلف پہلوؤں سے کی جا رہی ہیں۔

لاش کو پوسٹ مارٹم کے لیے سول اسپتال جمال آباد منتقل کر دیا گیا ہے، جبکہ واقعے کی ذمہ داری تاحال کسی مسلح تنظیم نے قبول نہیں کی۔