چیئرمین سینٹ سید یوسف رضا گیلانی کو دھمکی آمیز میسج موصول

ملتان(ڈیلی اردو)سابق وزیر اعظم و چیئرمین سینٹ یوسف رضا گیلانی کے موبائل فون پر نامعلوم شخص کا دھمکی آمیز میسج موصول ہونے پر پولیس نے مقدمہ درج کرلیا اور نامعلوم ملزم کی گرفتاری کے لئے اقدامات شروع کردیئے گئے۔

تفصیلات کے مطابق ہفتہ اور اتوار کی درمیانی شب چیئرمین سینیٹ یوسف رضا گیلانی کے موبائل نمبر پر نامعلوم شخص کی جانب سے پیغام موصول ہوا جس میں علی موسیٰ گیلانی کے حوالے سے دھمکی دی گئی۔

پولیس کے مطابق دھمکی آمیز میسج میں یہ کہا گیا کہ علی موسی گیلانی لوگوں کو بہت زیادہ ناجائز تنگ کر رہا ہے اور اوباش افراد کی سرپرستی کرتا ہے۔ دھمکی آمیز میسج ملنے پر ممبر قومی اسمبلی موسیٰ گیلانی نے پولیس تھانہ کینٹ کو درخواست دی جس پر پولیس نے نامعلوم افراد پر مقدمہ درج کر لیا گیا۔

دھمکی آمیز میسج والے نمبر کی لوکیشن ضلع خانیوال سے ٹریس ہوئی ۔ایس پی کینٹ طاہر مجید کی سربراہی میں سی آئی اے انچارج سمیت متعدد پولیس افسران کی ٹیم تشکیل دے دی گئی اور ملزم کی فوری گرفتاری کے لئے چھاپوں کا سلسلہ شروع کردیا گیا ہے۔