ڈیرہ اسماعیل خان آپریشن میں ٹی ٹی پی کے جنوبی پنجاب اور کشمیر کے اہم کمانڈر ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں سیکیورٹی فورسز کے حالیہ آپریشن میں تحریکِ طالبان پاکستان (ٹی ٹی پی) کے دو اہم کمانڈرز ہلاک ہو گئے، جو جنوبی پنجاب اور کشمیر کے لیے سرگرم تھے۔ کارروائی تحصیل درازندہ کے علاقے "کھوئی بہارہ" میں کی گئی، جس میں مجموعی طور پر تین شدت پسند مارے گئے۔

ہلاک ہونے والوں میں ایک شدت پسند ابو دردہ المعروف حکیم بھی شامل ہے، جو مظفرگڑھ کا رہائشی اور ٹی ٹی پی کے جنوبی پنجاب چیپٹر سے وابستہ تھا، جبکہ تنظیم کے میڈیا سیل میں بھی سرگرم کردار ادا کرتا تھا۔

اطلاعات کے مطابق حال ہی میں حکیم نے سرائیکی زبان میں ایک پروپیگنڈا ویڈیو کے ذریعے کالعدم تحریک لبیک پاکستان (ٹی ایل پی) کو ٹی ٹی پی میں شامل ہونے کی دعوت دی تھی۔

دوسرے ہلاک شدہ شدت پسند کی شناخت اعجاز احمد المعروف ابو دجانہ / علی حمدان کے طور پر ہوئی، جو ڈیرہ غازیخان کی تحصیل تونسہ شریف کا رہائشی تھا اور تازہ وجود میں آنے والے تحریکِ طالبان کشمیر (TTK) سے منسلک تھا۔ 

ذرائع کے مطابق ابو دجانہ کا تعلق سابق حرکت الجہاد الاسلامی کمانڈر اور 313 بریگیڈ کے سربراہ الیاس کشمیری سے بھی تھا۔ دونوں شدت پسند گزشتہ چند سالوں میں اپنے اہل خانہ کے ساتھ افغانستان منتقل ہو چکے تھے۔

تیسرے ہلاک شدہ شدت پسند کی شناخت تاحال معلوم نہیں ہو سکی۔

سیکیورٹی فورسز کے اہلکاروں کے مطابق یہ کارروائی ٹی ٹی پی اور نئے ابھرنے والے طالبان نیٹ ورکز کے عسکری ڈھانچے کو نقصان پہنچانے، ان کے منصوبوں کو ناکام بنانے اور خطے میں دہشت گردی کی سرگرمیوں کو محدود کرنے کے لیے کی گئی۔ فوجی آپریشن میں ہلاک ہونے والے کمانڈرز کی موجودگی اور ان کے روابط پاکستانی سیکیورٹی فورسز کے لیے ایک اہم کامیابی کے طور پر دیکھی جا رہی ہے۔

ماہرین کا کہنا ہے کہ اس طرح کے آپریشنز دہشت گردوں کے لیے ایک مضبوط انتباہ ہیں اور سیکیورٹی صورتحال بہتر بنانے میں اہم کردار ادا کرتے ہیں۔