ڈیرہ اسماعیل خان اور قلات میں سیکورٹی فورسز کے آپریشنز، ’ہائی ویلیو ٹارگٹ‘ سمیت 10 دہشت گرد ہلاک

راولپنڈی (ک م ) پاکستانی سیکیورٹی فورسز نے دہشت گردی کے متاثرہ علاقوں، خیبرپختونخوا کے ضلع ڈیرہ اسماعیل خان اور بلوچستان کے ضلع قلات میں خفیہ اطلاعات کی بنیاد پر کی گئی الگ الگ کارروائیوں میں ایک ہائی ویلیو ہدف سمیت 10 دہشت گرد ہلاک کر دیے۔

فوج کے شعبہ تعلقات عامہ (آئی ایس پی آر) کے مطابق 24 دسمبر کو ڈیرہ اسماعیل خان کے علاقے کلاچی میں انٹیلی جنس بیسڈ آپریشن کے دوران دو دہشت گرد مارے گئے، جن میں دہشت گرد لیڈر دلاور بھی شامل تھا۔ دلاور قانون نافذ کرنے والے اداروں کے لیے مطلوب تھا اور اس کے سر کی قیمت 40 لاکھ روپے مقرر تھی۔ ہلاک دہشت گردوں کے قبضے سے اسلحہ اور گولہ بارود بھی برآمد ہوا۔

اسی روز قلات میں بھارتی پراکسی گروپ فتنہ الہندستان سے تعلق رکھنے والے دہشت گردوں کی موجودگی کی اطلاع پر انٹیلی جنس بیسڈ آپریشن کیا گیا، جس میں آٹھ بھارتی سرپرستی یافتہ دہشت گرد ہلاک ہوئے۔ ان کے قبضے سے اسلحہ، گولہ بارود اور بارودی مواد بھی برآمد ہوا۔

پاکستان میں کالعدم تحریک طالبان پاکستان (ٹی ٹی پی) سے تعلق رکھنے والے عسکریت پسندوں کے لیے فوج اور سیکیورٹی فورسز اکثر اصطلاح "خوارج" استعمال کرتی ہیں۔ اس اصطلاح کا مقصد ملک میں دہشت گردی اور انتہا پسندی کے گروہوں کو نشانہ بنانا اور ان کے تشدد پر توجہ مرکوز کرنا ہے۔

جبکہ بلوچستان میں سرگرم بلوچ عسکریت پسند گروہوں کے لیے پاکستان بھارتی سرپرستی یافتہ پراکسی گروپ کا لفظ استعمال کرتا ہے اور انہیں فتنہ الہندستان کے نام سے جانا جاتا ہے، تاکہ بھارت کے مبینہ کردار اور سرپرستی کو اجاگر کیا جا سکے۔

آئی ایس پی آر کے مطابق علاقے میں مزید بھارتی سرپرستی یافتہ دہشت گردوں کے خاتمے کے لیے کلیئرنس آپریشن جاری ہے اور ملک میں غیر ملکی سرپرستی میں ہونے والی دہشت گردی کے مکمل خاتمے تک کارروائیاں جاری رہیں گی۔

گلوبل ٹیررازم انڈیکس 2025 کے مطابق پاکستان دہشت گردی سے متاثرہ ممالک میں دوسرے نمبر پر رہا، جہاں دہشت گرد حملوں میں ہلاکتوں کی تعداد گزشتہ سال کے مقابلے میں 45 فیصد بڑھ گئی۔ اسلام آباد کے تھنک ٹینک سینٹر فار ریسرچ اینڈ سیکیورٹی اسٹڈیز کے مطابق 2025 کی تیسری سہ ماہی میں شدت پسند حملوں میں اضافے اور انسداد دہشت گردی کی کارروائیوں میں تیزی کے باعث تشدد میں نمایاں اضافہ ہوا۔