ڈیرہ اسماعیل خان: پولیس اسٹیشن درابن پر راکٹ لانچر سے دہشت گردوں کا حملہ

ڈی آئی خان(نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں نامعلوم دہشت گردوں نے رات کی تاریکی میں تھانہ درابن پر حملہ کیا، جس دوران راکٹ لانچر کا استعمال بھی کیا گیا۔

ذرائع کے مطابق حملے کے نتیجے میں تھانے کی دیوار زمین بوس ہو گئی جبکہ عمارت کو بھی شدید نقصان پہنچا۔ واقعے کے بعد پولیس اور حملہ آوروں کے درمیان شدید فائرنگ کا تبادلہ ہوا۔

حملے کے باعث علاقے میں خوف و ہراس پھیل گیا، تاہم تاحال کسی جانی نقصان کی اطلاع نہیں ملی۔

پولیس ذرائع کا کہنا ہے کہ حملہ آوروں کا تعلق کالعدم تحریک طالبان پاکستان کے گنڈا پور گروپ سے بتایا جا رہا ہے، جو اس علاقے میں اس نوعیت کے متعدد حملوں کی ذمہ داری قبول کرتا رہا ہے۔