ڈیرہ غازیخان میں دہشت گردوں کا حملہ، فوجی تنصیبات اور پولیس اسٹیشن تباہ

واشنگٹن (ش ح ط) پاکستان کے صوبہ پنجاب کے ضلع ڈیرہ غازی خان میں دہشت گردوں نے تحصیل تونسہ کے علاقے کوہِ سلیمان اور قیصرانی میں بارڈر ملٹری پولیس (بی ایم پی) کی تنصیبات کو نشانہ بنایا۔

مقامی اور سرکاری ذرائع نے ڈیلی اردو کو بتایا کہ مسلح دہشت گردوں نے بی ایم پی کی ایک خالی چیک پوسٹ اور چتروٹہ پولیس اسٹیشن کو بارودی مواد سے تباہ کر دیا، جس کے نتیجے میں دونوں عمارتیں مکمل طور پر زمین بوس ہو گئیں۔

دوسری جانب کالعدم تحریک طالبان پاکستان نے اس حملے کی ذمہ داری قبول کرنے کا دعویٰ کیا ہے۔

یہ واقعہ تمان قیصرانی کے علاقے میں پیش آیا جو پنجاب، خیبر پختونخوا اور بلوچستان کی سرحدی پٹی کے قریب واقع ہے۔

کوہِ سلیمان کا یہ خطہ تحصیل تونسہ (تونسہ شریف) کے قریب واقع ایک اہم اور دشوار گزار پہاڑی علاقہ ہے، جو جغرافیائی طور پر تین صوبوں کے سنگم پر اسٹریٹجک اہمیت رکھتا ہے۔

حکام کے مطابق واقعے کے بعد علاقے میں سیکیورٹی سخت کر دی گئی ہے اور حملہ آوروں کی تلاش کے لیے سرچ آپریشن جاری ہے۔