کراچی سے کالعدم تحریک طالبان پاکستان کا کمانڈر گرفتار، امریکی ساختہ بم برآمد

کراچی (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) سندھ اور وفاقی حساس ادارے نے صوبائی حکومت کراچی کے علاقے نورس چورنگی منگھوپیر روڈ پر ٹارگیٹڈ کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے کمانڈر کو گرفتار کر لیا۔

ترجمان سی ٹی ڈی کے مطابق کارروائی کے دوران کالعدم تنظیم تحریک طالبان کا دہشت گرد کمانڈر یوسف خان عرف گل یوسف گرفتار کیا گیا، جس کا تعلق کالعدم تحریک طالبان پاکستان کے کمانڈر عظمت اللہ گروپ سے ہے۔

ترجمان کا مزید کہنا تھا کہ ملزم نے 2006 میں تحریک طالبان پاکستان سے منسلک ہوا۔

ترجمان سی ٹی ڈی نے بتایا کہ ملزم نے انکشاف کیا کہ اس نے جنوبی وزیرستان میں دہشت گردی کی جو کارروائیاں کیں، ان میں 2009 میں سیلہ سوئی قلعہ جنوبی وزیرستان ایف سی پر حملہ کمانڈر نور ولی کی سربراہی میں کیا، اور سروکئی پیسہ جنوبی وزیرستان میں ایف سی کی گاڑی کو ریموٹ کنٹرول بم کا دھماکا کیا، جس میں 6 اہلکار زخمی ہوئے۔

ترجمان کا کہنا ہے کہ ملزم کے خلاف تھانہ سی ٹی ڈی کراچی میں دہشت گردی کا مقدمہ درج کر کے مزید تفتیش کا عمل جاری ہے۔