کراچی میں رینجرز کمپاؤنڈ پر خودکش حملہ، 10 افراد ہلاک، متعدد زخمی

واشنگٹن (ش ح ط) پاکستان کے سب سے بڑے تجارتی شہر کراچی کے علاقے گلستانِ جوہر میں رینجرز کمپاؤنڈ پر مبینہ طور پر بارودی مواد سے بھری گاڑی کے ذریعے خودکش حملہ کیا گیا، جس کے بعد فائرنگ کا سلسلہ بھی شروع ہوگیا۔

عینی شاہدین کے مطابق ہفتے کی شب گلستانِ جوہر بلاک 5 میں سچل رینجرز کی عمارت کے قریب زور دار دھماکے کی آواز سنی گئی، جس کے بعد وقفے وقفے سے شدید فائرنگ جاری رہی۔

سرکاری ذرائع کے مطابق اس واقعے میں کم از کم 10 افراد ہلاک ہوئے ہیں، جن میں سکیورٹی اہلکار بھی شامل ہیں، جبکہ متعدد افراد زخمی بتائے جا رہے ہیں۔

حکومتی سطح پر تاحال جانی نقصان کی حتمی تصدیق نہیں کی گئی، تاہم ذرائع کے مطابق واقعے کے بعد سکیورٹی فورسز نے فوری جوابی کارروائی کرتے ہوئے علاقے کو گھیرے میں لے لیا۔

کالعدم تنظیم نے دعویٰ کیا ہے کہ اس کے چار خودکش حملہ آور کمپاؤنڈ کے اندر داخل ہو گئے تھے، جبکہ سرکاری ذرائع کے مطابق پانچ حملہ آوروں کے ہلاک ہونے کے دعوے بھی سامنے آئے ہیں۔

واقعے کے بعد رینجرز اور دیگر قانون نافذ کرنے والے ادارے موقع پر پہنچ گئے ہیں اور علاقے میں کلیئرنس اور سرچ آپریشن جاری ہے۔ سکیورٹی اقدامات کے تحت علاقے کو سیل کر دیا گیا ہے اور شہریوں کی آمد و رفت محدود کر دی گئی ہے۔

ریسکیو 1122 کے مطابق اطلاع ملتے ہی امدادی ٹیمیں جائے وقوعہ کی جانب روانہ کر دی گئی ہیں۔

سندھ حکومت کے ترجمان کے مطابق وزیراعلیٰ سندھ سید مراد علی شاہ نے واقعے کی فوری رپورٹ طلب کر لی ہے اور پولیس و سکیورٹی اداروں کو ہدایت دی ہے کہ واقعے کی مکمل نوعیت اور نقصانات کا تعین کیا جائے۔

کالعدم تنظیم جماعت الاحرار نے اس حملے کی ذمہ داری قبول کرنے کا دعویٰ کیا ہے۔

حکام کے مطابق تحقیقات جاری ہیں اور صورتحال پر مسلسل نظر رکھی جا رہی ہے۔ 

مزید تفصیلات کا انتظار ہے۔