کراچی میں فائرنگ سے نیوی اہلکار شہید

کراچی (ڈیلی اردو) صوبہ سندھ کے صوبائی دارالحکومت کراچی کے علاقے شاہ فیصل کالونی میں نامعلوم مسلح افراد نے فائرنگ کرکے نیوی اہلکار کو شہید کردیا۔

سیکیورٹی ذرائع کے مطابق عبدالاشفاق کو گرین ٹاؤن میں تقریباً پونے چار بجے گھر پر نشانہ بنایا گیا۔

ایس ایس پی کورنگی علی رضا نے شہید کے اہلخانہ کا حوالہ دیتے ہوئے بتایا کہ دو مسلح شخص گھر میں آئے اور عبدالاشفاق پر فائرنگ کردی۔

انہوں نے بتایا کہ شہید نیوی اہلکار کے پیٹ میں گولی لگی تاہم انہیں پی این ایس شفا منتقل کیا گیا جہاں ڈاکٹروں نے ان کی شہادت کی تصدیق کردی۔

اس ضمن میں ایس ایس پی نے مزید بتایا کہ مشتبہ ملزمان گھر سے کچھ بھی ساتھ لے کر نہیں گئے۔

ان کا کہنا تھا کہ ایسے گواہ نہیں ملے جو اس امر کی تصدیق کر سکیں کہ قاتلوں اور شہید کے مابین کوئی تلخ کلامی ہوئی ہو۔

پولیس کے مطابق وہ قتل کے محرکات جاننے کے لیے تحقیقات کررہے ہیں تاکہ قاتلوں کا سراغ لگایا جاسکے۔

علاوہ ازیں بتایا گیا کہ مقتول پی این ایس عظمت میں بطور ماسٹر چیف پیٹی افسر تعینات تھے۔

پولیس اور حساس اداروں نے تحقیقات کا دائرہ کار وسیع کردیا ہے