کراچی میں فائرنگ: کالعدم تنظیم اہلِ سنت والجماعت کے دو افراد ہلاک

کراچی (نمائندہ ڈیلی اردو) صوبہ سندھ کے دارالحکومت کراچی میں ناگن چورنگی کے قریب موٹر سائیکل سوار مسلح افراد کی فائرنگ سے کالعدم شدت پسند تنظیم اہلِ سنت والجماعت سے وابستہ دو افراد ہلاک ہوگئے۔ حملہ آور واردات کے بعد باآسانی فرار ہوگئے۔

ریسکیو ذرائع کے مطابق ناگن چورنگی کے قریب ایک دکان پر فائرنگ کے نتیجے میں دو افراد موقع پر ہی ہلاک ہوگئے۔ لاشوں کو قریبی اسپتال منتقل کردیا گیا ہے۔

پولیس کے مطابق ہلاک ہونے والوں کی شناخت مولانا سید شاہ اویس پیرزادہ اور ابوبکر کے ناموں سے ہوئی ہے۔ مولانا اویس پیرزادہ کا تعلق گلگت بلتستان کے ضلع استور سے بتایا جاتا ہے۔

پولیس کا کہنا ہے کہ ملزمان موٹر سائیکل پر سوار تھے اور انہوں نے ہیلمٹ پہن رکھے تھے۔ واقعہ بظاہر ٹارگٹ کلنگ معلوم ہوتا ہے۔

حکام کے مطابق واقعے کی سی سی ٹی وی فوٹیج بھی حاصل کر لی گئی ہے، جس میں دیکھا جا سکتا ہے کہ دو حملہ آور موٹر سائیکل پر دکان کے سامنے رکے، ان میں سے ایک ملزم نیچے اتر کر دکان میں گیا اور فائرنگ کے بعد دونوں حملہ آور موقع سے فرار ہوگئے۔