کرم میں اغوا اور ہلاکتیں، ٹل–پاراچنار روڈ سمیت تمام اہم راستے بند

پاراچنار/صدہ (نمائندگان ڈیلی اردو) پاکستان کے شورش زدہ صوبے خیبر پختونخوا کے قبائلی ضلع کرم میں اغوا اور ہلاکت کے حالیہ واقعات کے بعد مرکزی شاہراہ ٹل–پاراچنار روڈ سمیت آمدورفت کے تمام اہم راستے بند ہیں، جس کے باعث شہریوں، مریضوں اور طلبہ کو شدید مشکلات کا سامنا ہے۔

کرم پولیس کے مطابق اپر کرم میں مالی خیل قبیلے کے رہنما حاجی کاکئے اور بوشہرہ کے رہائشی ریاض خان کو نامعلوم افراد نے اغوا کے بعد ہلاک کر دیا۔ دونوں افراد کی لاشیں غیر آباد علاقوں سے برآمد ہوئیں۔ اس سے قبل مالی خیل کے رہائشی گل مرجان کی لاش بھی دریا کے کنارے سے ملی تھی، یوں 24 گھنٹوں کے دوران دو لاپتہ افراد کی لاشیں برآمد ہوئیں۔

ان واقعات کے بعد سیکیورٹی خدشات کے پیش نظر ٹل–پاراچنار روڈ اور دیگر رابطہ سڑکیں بند کر دی گئیں، جس کے باعث پشاور سمیت دیگر شہروں سے زمینی رابطہ منقطع ہے۔

انجمنِ حسینیہ کے رہنما جلال حسین بنگش نے کہا کہ متعدد امن معاہدوں کے باوجود مرکزی شاہراہ گزشتہ چودہ ماہ سے مکمل طور پر بحال نہیں ہو سکی۔ انہوں نے کہا کہ سڑکوں کی بندش سے مریضوں، مسافروں اور طلبہ کو شدید مشکلات کا سامنا ہے اور حکومت فوری اقدامات کرے۔

انجمنِ فاروقیہ نے اپنے بیان میں کہا کہ بوشہرہ میں نوجوان کی ہلاکت ضلع کرم میں دہشت گردی کی حالیہ مثال ہے۔ اس سے قبل کوہاٹ معاہدے کی خلاف ورزیاں، بوشہرہ پر راکٹ حملے، مہورہ میں ہلاکتیں اور جینداڑی سمیت دیگر علاقوں میں بھی ایسے واقعات سامنے آ چکے ہیں۔

بیان میں کہا گیا کہ اگر گمشدگی کے فوراً بعد پولیس اور ضلعی انتظامیہ بروقت حرکت میں آتی تو یہ نوبت نہ آتی، کیونکہ تمام تر وسائل اور ذمہ داری انہی اداروں کے پاس ہے۔ انجمن کے مطابق اتنے بڑے واقعے کے بعد بھی محض معمول کی گرفتاریاں ضلع کرم میں امن کے قیام میں ایک بڑی رکاوٹ ہیں۔

انجمنِ فاروقیہ نے مطالبہ کیا کہ ضلع کرم میں امن کے لیے بڑے اور غیر معمولی اقدامات کیے جائیں، جبکہ بوشہرہ کے عوام کو پُرامن رہنے کی تلقین بھی کی گئی ہے۔ بیان میں کہا گیا کہ انجمن ریاست اور علاقے کے مشران کے ساتھ مسلسل رابطے میں ہے اور امن و امان کے قیام کے لیے ہر ممکن قدم اٹھائے گی تاکہ قومی اتفاقِ رائے سے ایک مؤثر حکمت عملی اپنائی جا سکے۔

دوسری جانب ضلعی انتظامیہ کا کہنا ہے کہ سیکیورٹی صورتحال کا جائزہ لیا جا رہا ہے اور راستے کھولنے کے لیے اقدامات جاری ہیں تاکہ معمولاتِ زندگی بحال ہو سکیں۔