کرم میں نادرا کی موبائل وین پر مسلح افراد کی فائرنگ

پشاور (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع کرم میں نامعلوم مسلح افراد نے نادرا کی موبائل رجسٹریشن وین پر فائرنگ کر دی، تاہم واقعے میں کوئی جانی نقصان نہیں ہوا۔

پولیس کے مطابق واقعہ وسطی کرم کی تحصیل تڑلی کے علاقے ڈوگر میں اس وقت پیش آیا جب نادرا کی موبائل وین ڈوگر میں قائم عارضی دفتر سے عملے کو واپس صدہ بازار منتقل کر رہی تھی۔ راستے میں نامعلوم مسلح افراد نے گاڑی پر اندھا دھند فائرنگ کر دی۔

پولیس کا کہنا ہے کہ فائرنگ کے باوجود نادرا کا تمام عملہ محفوظ رہا، تاہم متعدد گولیاں لگنے سے موبائل وین کو نقصان پہنچا۔

واقعے کے فوری بعد پولیس اور دیگر سکیورٹی اہلکار موقع پر پہنچ گئے، علاقے کو گھیرے میں لے کر شواہد اکٹھے کیے گئے اور حملہ آوروں کی تلاش کے لیے سرچ آپریشن شروع کر دیا گیا۔

پولیس حکام کے مطابق حملہ آوروں کی شناخت اور واقعے کے محرکات جاننے کے لیے تحقیقات جاری ہیں، جبکہ تاحال کسی گروپ نے حملے کی ذمہ داری قبول نہیں کی۔