کرم میں گاڑی کے قریب دھماکا، ایک ہی خاندان کے 5 افراد ہلاک، 2 شدید زخمی

اسلام آباد (ش ح ط) صوبہ خیبر پختونخوا کے قبائلی ضلع کرم کے علاقے تیندو میں سڑک کنارے بم دھماکے میں پانچ افراد ہلاک اور دو شدید زخمی ہوگئے۔

تفصیلات کے مطابق سینٹرل کرم میں سڑک کنارے نصب بم کے دھماکے میں ایک ہی گاڑی موجود پانچ افراد ہلاک اور دو شدید زخمی ہوئے۔

ریسکیو کے مطابق دھماکے سے کار تباہ ہو گئی جبکہ سات افراد زخمی ہو گئے، لاشوں اور زخمیوں کو ہسپتال منتقل کر دیا گیا۔

مقامی ذرائع کا کہنا ہے کہ بدقسمت خاندان 4 سال بعد اسلام آباد سے عید منانے کرم آئے تھے۔

پولیس کے مطابق تمام افراد قربانی کا جانور اور عید کے لئے سامان لینے جارہے تھے کہ دھماکہ کیا گیا۔ ہلاک ہونے والوں میں سعید اللہ ، بھائی حنیف اللہ اور سعید اللہ کے بیٹے حسنین کے علاوہ ذکریا شامل ہے۔

زخمیوں کو فوری طور پر ہسپتال منتقل کیا گیا جہاں دو کی حالت تشویشناک بتائی جارہی ہے۔

حکام کے مطابق ایک شدید زخمی کو ریسکیو ابمولینس کے ذریعے پشاور منتقل کیا جارہا تھا کہ ٹل کے مقام پر جان کی بازی ہار گیا۔

پولیس کے مطابق ابتدائی اطلاع یہ تھی کہ یہ آئی ای ڈی دھماکہ تھا تاہم اب تک کی معلومات کے مطابق یہ ایک مقناطیسی بم تھا جو کہ گاڑی کے ساتھ نصب کیا گیا تھا۔

ڈی پی او کرم کے مطابق دھماکی تحقیقات شروع کردی گئی ہیں۔

دھماکے کی ذمہ داری اب تک کسی گروپ یا تنظیم نے قبول کرنے کا دعویٰ نہیں کیا ہے، تاہم سڑک کنارے نصب بم کے دھماکے اکثر طالبان کی طرف سے کیے جاتے ہیں۔

دوسری طرف ادھر لوئر کرم کے علاقے ساتین میں نامعلوم مسلح افراد نے فائرنگ کر کے دو بھائیوں حبیب اور شیرین کو ہلاک کردیا۔ جبکہ حملہ آور فرار ہوگئے۔ پولیس کے مطابق واقعے کی مزید تحقیقات جاری ہیں۔