کرم: پاراچنار کے نواحی علاقے میں فائرنگ، سنی مسلک کے دو افراد ہلاک

واشنگٹن (ش ح ط)  پاکستان کے شورش زدہ صوبے خیبر پختونخوا کے قبائلی ضلع کرم کے صدر مقام پاراچنار کے نواحی علاقے جنداڑی اور مینگک کے درمیان ترخیل کے مقام پر نامعلوم دہشت گردوں کی فائرنگ سے سنی مسلک سے تعلق رکھنے والے نیک محمد اور ناصر خان ہلاک جبکہ ابراہیم زخمی ہوگیا۔

پولیس کے مطابق واقعے کے بعد مختلف مقامات پر کارروائیاں کرتے ہوئے شیعہ مسلک سے تعلق رکھنے والے آٹھ مشتبہ افراد کو گرفتار کرکے تفتیش کے لیے منتقل کر دیا گیا ہے۔ مزید تفتیش جاری ہے۔

پولیس ذرائع کے مطابق گزشتہ چند ماہ کے دوران اس علاقے میں ٹارگٹ کلنگ کے ایک درجن سے زائد واقعات رونما ہو چکے ہیں۔

واضح رہے کہ ضلع کرم میں سنی عسکریت پسند تنظیم العیشہ بریگیڈ، کالعدم تحریک طالبان پاکستان اور ایرانی حمایت یافتہ زینبیون بریگیڈ سرگرم ہیں، اور علاقے میں شیعہ سنی کشیدگی وقتاً فوقتاً شدت اختیار کرتی رہی ہے۔