کرک: پولیس کا سرچ آپریشن اہم کمانڈر ہلاک ، دہشتگردوں کے ٹھکانے نذر آتش

کرک(ڈیلی اردو) کرک میں پولیس اہلکار سعید نواز کی ہلاکت کے بعد دہشتگردوں کے خلاف بڑے پیمانے پر کارروائی کی گئی۔ تھانہ شاہ سلیم کی حدود میں پولیس اور سی ٹی ڈی کے مشترکہ سرچ اینڈ سٹرائیک آپریشن میں کالعدم تنظیم کے اہم کمانڈر فدا اللہ مارا گیا، جبکہ دہشتگردوں کے تمام محفوظ ٹھکانے مسمار اور نذر آتش کر دیے گئے۔

ڈی پی او کرک کے مطابق، آپریشن مکمل انٹیلی جنس معلومات اور سیکیورٹی حکمت عملی کے تحت کیا گیا، جس میں بھاری نفری شریک رہی۔ کارروائی کا ہدف دہشتگرد کمانڈر ثناء اللہ جلالی اور اس کے ساتھی عطاء اللہ تھے۔ پولیس کی بروقت کارروائی کے باعث دہشتگردوں کی سپلائی لائن منقطع ہوئی اور علاقے کو کلیئر کر لیا گیا۔

ڈی پی او کا کہنا تھا کہ کرک پولیس ہر اس عنصر سے سختی سے نمٹے گی جو امن و امان کو چیلنج کرے گا، اور ضلع میں قانون کی بالادستی ہر صورت میں قائم رکھی جائے گی۔ یاد رہے کہ یہ آپریشن اہلکار سعید نواز کی ہلاکت کے بعد ردعمل کے طور پر شروع کیا گیا تھا۔