کوہاٹ میں سی ٹی ڈی کا آپریشن، 3 دہشت گرد ہلاک، اسلحہ برآمد

کوہاٹ (نمائندہ ڈیلی اردو)پاکستان کے شورش زدہ صوبہ خیبر پختونخوا کے ضلع کوہاٹ میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر کارروائی کرتے ہوئے تین دہشت گردوں کو ہلاک کر دیا۔

سی ٹی ڈی کے ترجمان کے مطابق آپریشن دہشت گردوں کی موجودگی کی اطلاع ملنے پر کیا گیا۔ کارروائی کے دوران دہشت گردوں اور سی ٹی ڈی اہلکاروں کے درمیان فائرنگ کا تبادلہ ہوا، جس کے نتیجے میں تین دہشت گرد ہلاک ہو گئے۔

ترجمان کا کہنا ہے کہ ہلاک دہشت گردوں کے قبضے سے تین کلاشنکوفیں اور دیگر اسلحہ و گولہ بارود برآمد کیا گیا ہے، جنہیں تحویل میں لے کر مزید تحقیقات شروع کر دی گئی ہیں۔

سی ٹی ڈی کے مطابق کارروائی کے دوران بعض دہشت گرد فرار ہونے میں کامیاب ہو گئے، جن کی گرفتاری کے لیے علاقے میں سرچ آپریشن جاری ہے۔

ایڈیشنل انسپکٹر جنرل (آئی جی) سی ٹی ڈی نے کامیاب کارروائی پر آپریشن میں حصہ لینے والے اہلکاروں کی کارکردگی کو سراہتے ہوئے انہیں خراج تحسین پیش کیا۔

انہوں نے کہا کہ صوبے سے دہشت گردی کا مکمل خاتمہ حکومت اور قانون نافذ کرنے والے اداروں کی اولین ترجیح ہے اور دہشت گرد عناصر کے خلاف کارروائیاں بلا امتیاز جاری رکھی جائیں گی۔

سی ٹی ڈی حکام کا کہنا ہے کہ دہشت گردوں کے سہولت کاروں اور نیٹ ورکس کے حوالے سے بھی تحقیقات جاری ہیں تاکہ علاقے میں امن و امان کی صورتحال کو مزید بہتر بنایا جا سکے۔