کوہاٹ میں نامعلوم افراد کی فائرنگ سے پولیس اہلکار ادیب حسین شہید

اسلام آباد (ش ح ط) خیبر پختونخوا میں چوبیس گھنٹے کے دوران پولیس پر دوسرا حملہ، ضلع کوہاٹ میں نامعلوم افراد نے فائرنگ کرتے ہوئے پولیس اہلکار کو شہید کردیا ہے۔

ذرائع کے مطابق فائرنگ کا واقعہ کوہاٹ کے علاقے گڑھی مواز خان میں پیش آیا، جہاں ڈیوٹی پر موجود ہیڈ کانسٹیبل ادیب حسین پر نامعلوم افراد نے اندھا دھند فائرنگ کی، جس کے نتیجے میں وہ موقع پر ہی دم توڑ گیا۔

واقعے کی اطلاع ملنے پر پولیس کی بھاری نفری علاقے میں پہنچی اور شہید کے جسد خاکی کو مقامی ہسپتال منتقل کیا اور علاقے میں سرچ آپریشن شروع کردیا۔

پولیس کے مطابق شہید پولیس اہلکار کا تعلق علاقہ کچئی سے تھا۔

فوری طور پر حملے کی ذمہ داری کسی گروپ یا تنظیم کی جانب سے قبول نہیں کی گئی ہے۔

اس سے قبل ملاکنڈ ڈویژن کے علاقے درگئی میں بھی نامعلوم حملہ آوروں کی فائرنگ سے ڈی ایس پی شانگلہ نصیب شاہ کو نشانہ بنایا گیا۔

ذرائع کا کہنا ہے کہ نامعلوم مسلح افراد نے ڈی ایس پی نصیب شاہ کے گھر کے اندر گھس گئے اور فائرنگ کردی جس کے نتیجے میں چھٹی پر آئے ہوئے نصیب شاہ موقع ہی پر شہید ہوگئے۔ جبکہ ملزمان واردات کے بعد فرار ہونے میں کامیاب ہوگئے۔

ماضی میں پولیس اہلکاروں پر حملوں کی ذمہ داری کالعدم تنظیمیں قبول کرتی رہی ہے۔