کوہاٹ میں پولیس کارروائی میں 3 دہشت گرد ہلاک

کوہاٹ (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع کوہاٹ میں پولیس نے بازید خیل کے قریب ایک کارروائی کے دوران تین دہشت گردوں کو ہلاک کر دیا ہے۔

ڈی پی او کوہاٹ شہباز الٰہی کے مطابق تھانہ صدر کے ایس ایچ او ریاض معمول کے گشت پر تھے کہ دہشت گردوں نے ان کی گاڑی پر اچانک فائرنگ کر دی۔ پولیس نے فوری طور پر بھرپور جوابی کارروائی کی اور تینوں دہشت گرد موقع پر ہی ہلاک ہو گئے۔

فائرنگ کے تبادلے میں کوئی پولیس اہلکار زخمی یا ہلاک نہیں ہوا۔ ہلاک دہشت گردوں کی لاشیں مقامی اسپتال منتقل کر دی گئی ہیں جبکہ ان کی شناخت اور نیٹ ورک سے متعلق مزید تحقیقات جاری ہیں۔

پولیس ذرائع نے ڈیلی اردو کو بتایا کہ ہلاک دہشت گردوں کا تعلق کالعدم تحریک طالبان پاکستان (ٹی ٹی پی) سے تھا۔

دیگر کارروائیاں

مردان میں کاؤنٹر ٹیررازم ڈیپارٹمنٹ (سی ٹی ڈی) نے سرچ آپریشن کے دوران کارروائی کرتے ہوئے ٹی ٹی پی کے دو موٹر سائیکل سوار دہشت گردوں کو ہلاک کر دیا۔

باجوڑ اور کرک میں بھی سکیورٹی فورسز نے الگ الگ کارروائیوں میں تین دہشت گرد ہلاک کر دیے ہیں۔

اغوا کے واقعات

ادھر جنوبی وزیرستان اور بنوں میں دہشت گردوں نے دو الگ واقعات میں پولیس کانسٹیبل میثل خان اور سیکیورٹی فورسز کا  اہلکار راشد کو اغوا کر لیا ہے۔